SA matag abot sa gihuwat nga balikbayan boxes, ang ngisi sa matag sakop sa pamilya nga makadawat og grasya--kon sumpayon--moabot seguro sa pikas eskina.
Wala’y magmahay. Sila si Inday, Dodong, Ate, Kuya, Papa, Mama, Lolo ug Lola, ang tanan adunay ilaha. Usahay ang suod nga mga silingan mapiksan apan dili ang mga tsismosa ug libakera.
Inig abli sa balikbayan box, ang mga mata sa mga naghinamhinam magsugod na sa pagsulirap kay madawat na ang gipangtugon kaniadto pa.
Apan usahay dili malikayan nga adunay mag-away kay mag-ilog sa butang nga nalimtan sa nagpadala pagsuwat og pangalan.
Aduna sa’y magmug-ot kay nagdahom og Under Armour apan ang naabot dili diay branded nga sapatos.
Kaluoy pud intawon sa nagpadala kay imbes pasalamat, kasamok ug bagutbot na man hinuon ang nadawat.
Wala seguro’y mahitabong ingon ani kon nasayod pa lang ang tanan kon unsa kalisod pag-andam og balikbayan box.
Personal kong nasuwayan ang pag-andam niini dihang nakabakasyon kami sa akong asawa sa Amerika.
Dili na sayon ang pagpalit ug papangita pa lang sa mga gipangtugon. Pero dili lang ta maghisgot og kuwarta kay wa man koy gikuot sa bulsa niadtong mga higayuna, ang tanan sa akong maguwang nga doktora.
Unsa na lang diay kaha kon ako pa tong kuwarta ang gipangpalit? Mosamot seguro ko og kaluya.
Kasagaran managhap mi pagpangita sa mga gipangtugon sa “clearance sale.” Usahay makakita, usahay dili.
Kon mapalit na ang tanang gipangtugon human sa tantong pagbalikbalik og lakaw sa matag adlaw, hinayhinayan na kini pagsulod sa balikbayan box nga adunay lainlain nga sukod. Ang kinadak-an kay 24×24.
Usa ra gani ka balikbayan box unya 20×20 ra’y sukod ang akong gipuno, nanakit na ang akong hawak.
Unya inig ka puno, alsahon ang box aron timbangon daan kay kinahanglang dili molapas sa gitugot nga gibug-aton.
Kon alang sa libreng bagahi sa eroplano, dili ka magkinahanglan og 24×24 nga box, puwede na ang 20×20 gumikan kay limitado ang gibug-aton.
Makadala man tuod og duha ka boxes nga libre nga mga bagahi apan kinahanglan dili molapas og 50 pounds ang matag usa. Kon mahitabong molapas, kinahanglan kining habwaon sa airport.
Kon ipadala sa barko, walay limit ang gibug-aton apan aduna la’y bayranan matag balikbayan box depende asa gikan ug asa paingon.
Maong mobusdik ang balikbayan box kon sa barko ipadala kay ipangduot na man og maayo aron daghan ang masulod.
Kon gikan sa San Francisco, USA paingon sa Cebu, ang bayranan matag balikbayan box kay $70, kamo na lay convert sa peso. (Kun sa ilis nga P48, naa sa P3,360.)
Sa dihang nasirado na nako ang among kargahon nga balikbayan box pabalik sa Cebu, gipaningot ko bisan tugnaw ang panahon ug giingnan ko sa akong maguwang, “Now you know.”
Mingisi ko ug nagpasalamat og dako sa akong maguwang.
Apan sa hilom, naigo ko anang gitawag nila og “guilty.” Nagbagutbot man gud ko sa una kay ang akong gitugon Nike nga sapatos apan ang akong nadawat--mahalon man tuod gihapon--apan lain man og brand.