COTABATO CITY -- Gimando ni Governor Mujiv Hataman sa Autonomous Region in Muslim Mindanao (Armm) ang pagsuspende kang Talitay Mayor Montassir Sabal sa Maguindano Province.
Si Hataman, kinsa maoy presiding chairman sa inter-agency regional peace and order council, namahayag nga iya na nga gitahasan si local government secretary Datu Kirby Abdullah nga mohimo og draft sa suspension order ngadto kang Sabal.
Hinuon ang pagsuspende kang Sabal di bahin sa pagkalambigit matud pa niini sa ilegal nga druga ug mga armas apan ang pag-absent niini og pipila na ka bulan sa iyang katungdanan.
Bag-ohay lamang gironda sa militar ug kapulisan ang balay nila Sabal ug sa iyang igsuon nga si Vice Mayor Abdulwahab Sabal diin nakuha ang daghang mga shabu ug mga tag-as nga matang sa armas.
Apil sab sa gironda ang balay ni assemblyman Sidik Ameril nga ilang paryente diin dunay nakuha sab nga shabu ug armas ang mga raiding team.
Gidugang ni Hataman nga si Armm-Regional Legislative Assembly speaker Ronnie Sinsuat ang dunay katungod kung unsay angay niyang himuong lakang batok kang Ameril.
Gikompirma mismo ni Hataman nga sa diha nga gihinganlan ni Pangulong Rodrigo Duterte sila Sabal ug Ameril nga nalambigit sa drug trade sa Maguindanao tagsa na lang sila nga motambong sa ilang trabaho.
Una nang nadakpan sa mga sakop sa Criminal Investigastion and Detection Group si Abdulwahab sa Awang Airport diin nakuhaan siya og mga armas ug shabu.
Atol sa gilusad nga anti-drug operation sa mga awtoridad, ila sab nga na-engkuwentro ang mga armadong grupo nga nagprotekta sa magsuon nga Sabal apan nakaipsot sa diha nga nakabantay sa puwersa sa militar ug kapulisan.
Kahinumdoman nga nanghimakak sila Sabal sa akusasyon nga sila nalambigit sa drug trade ug nagkanayon nga butang-butang lang kini ug walay kamatuoran.
Padayon nga gipangita sa mga awtoridad sila Montassir ug Ameril nga giingong out-of-town sa diha nga gironda ang ilang mga bay sa Talitay.