ILIGAN CITY -- Anaa na karon sa rehiyonal nga buhatan sa kapulisan ang pito ka mga pulis sa Iligan City Police Office alang sa imbestigasyon human sila gi-akusahang adunay kalambigitan sa pagpusil patay sa usa ka Criminology student niadtong Agusto 18 sa Barangay Pala-o ning dakbayan.
Ang maong mga pulis nailang sila si Senior Police Officer 1 (SPO1) Regel Rabago, PO2 Raymond Cuyos, PO2 Dionirel Cutanda, PO1 Creighgen Padayhag, PO1 Andro Sumaylo, PO1 Janeth Mission ug PO1 Mabelle Hubilla.
"Dunay impormasyon nga nadawat ang investigating body nga mao ang National Bureau of Investigation nga usa nila ang suspek sa pagpatay sa maong estudyante.
"Wala sila dungan nga gi-transfer. Lima ang una, dayun gisunod ang duha," miingon si Senior Superintendent Leony Roy Ga, officer-in-charge sa ICPO, sa interview sa SunStar SuperBalita.
Matud ni Ga nga didto sa crime scene ang maong mga manag-classmate nga pulis sa wala pa mahitabo ang pagpamusil tungod kay off duty sila ug nagkasinabot nga mag-bonding sa maong imnanan.
"Nakadawat ta og order nga temporaryo silang i-transfer didto sa Camp Alagar, so most probably ang request deretso kang Regional Director (Chief Superintendent Noel Constantino). Sa part sa ICPO, okay ra pud nga naa sila didto kay aron ang complainant dili maka-ingon nga duna tay gidapigan o dunay cover-up," dugang ni Ga.
Human mahitabo ang maong kremin, deretso nga midangop ang pamilya ngadto sa NBI aron maoy mohimo sa imbestigasyon. Nasayran nga dunay uyu-an ang biktima nga undersecretary sa Department of Justice.
Apan giklaro ni Ga nga bisan paman niini, duna gihapoy gimugna ang ICPO nga investigating team aron mohimo sa ilang bulag nga imbestigasyon.
"Ang atong CIDMB maoy nanguna sa imbestigasyon kay bisan og sa area sa station 5 nahitabo, atoa gikuha gikan nila ang pag-imbestiga kay ang usa sa mga gi-akusahan kay investigator man to sa station 5," miingon si Ga.
Una na'ng miingon ang kapulisan nga "rido" ang ilang usa sa gitan-aw nga motibo sa kremin.
Apan si Ga miingon nga nanguyab ang biktima sa asawa sa usa sa mga gi-akusahang pulis.
Si Azis, 21-anyos, Criminology student sa Iligan Capitol College, taga-Pasayon, Matungao, Lanao del Norte.
Ang pamilya niini usa sa mga dagkung pulitiko sa lungsod. Bag-o pa lang kini nahuman sa iyang internship sa ICPO.