NAGTINGUHA ang awtoridad sa nasud sa Taiwan nga ma-deport ang ilang mga nationals nga nadakpan sa National Bureau of Investigation (NBI) 7 aron madala kinig balik ngadto sa ilang dapit ug didto na atubangon ang kaso may kalabutan sa ilang gihimo nga online fraud.
Kini ilabi na usab kay sagad sa mga biktima nga nangrekalmo labot niini, pulos man gikan sa Taiwan.
Nasugdan na sa NBI ang pagproseso ang mga ebidensiya batok sa mga langyaw nga nasikop niadtong Lunes sa hapon, sa Barangay Guadalupe, siyudad sa Sugbo, human gireklamo og online fraud.
Sa 24 nga nasikop, nasayran nga 19 lang niini ang Taiwanese nationals ug ang laing lima mga Chinese nationals diay.
Modus nila ang pag-blackmail sa mga retired Taiwanese officials aron makapangilkil og kwarta.
Matod sa NBI 7 regional director Patricio Bernales, Jr., nakig-alayon na sila sa Bureau of Immigration aron pagsuta kon legal ang pag-istar sa mga langyaw dinhi sa Pilpinas.
Dungan niini, gilihok na usab sa ahensiya ang mga gikinahanglan nga mga dokumento alang sa pagpasaka ug kasong kalapasan sa Republic Act 10175 o Cybercrime Prevention Act.
Kini bisan paman sa posibilidad nga ma-deport ra gihapon ang mga langyaw.
“Most probably, ma-deport ra gyud ni sila pero mag-atubang gyud sila og kaso sa ato,” niingon si Bernales.
Gawas sa mga operatiba sa NBI Regional Cybercrime Center, dunay mga representante sa awtoridad sa Taiwan ang nitabang nga mahan-ay ang mga ebidensiya batok sa mga dinakpan aron pagsuta usab kon kinsa pa ang ubang mga biktima.
Lakip sa mga ebidensiya nga nakuha gikan sa girondang panimalay ang nagkadaiyang mga cellphone, telepono, pipila ka mga computer units ug mga high-tech nga data communication gadget nga maka-transmit ug makadawat og mga data gikan sa nagkadaiyang bahin sa kalibutan.
Usa sa mga Taiwan police attaché nga nahinabi sa mga tigbalita apan wa na magpaila tungod sa sensitibo nila nga trabaho, miingon nga mas maayong ma-deport ang mga dinakpan aron ila kining madala og balik sa ilang nasud ug didto paatubangon sa mga kaso batok kanila.
Dinhi sa Pilipinas, bailable lang ang kaso nga maoy ipasaka batok sa mga langyawng dinakpan apan didto sa Taiwan, mahug kini nga felony o seryusong krimen ug duna kini bug-at nga silot.
“There’s a more severe punishment in Taiwan than here in the Philippines,” sigun sa police attaché.
Gitug-an sab niya nga sa milabay nga lima ka tuig, kapin na sa 500 ka mga Taiwanese suspect nga nasikop sa Pilipinas tungod sa online fraud ang ilang napa-deport ug napasakaan og kaso ngadto sa ilang nasud.
Gisuta pa og sakop ba sa mas dako nga sindikato ngadto sa Taiwan ang nag-operate sa online fraud business dinhi sa Sugbo, nga nabisto sa NBI.