SUPAK ang Oro Chamber sa Cagayan de Oro nga i-relieve sa pwesto si Cagayan de Oro City Police Office City Director Ronnie Francis Cariaga.
Matud ni Oro Chamber President Jeffrey Ang nga sayo pa kaayo nga i-relieve sa pwesto si Cariaga tungod kay padangaton usab ang Disyembre ug laing adjustment na usab kung hulipan kini.
Daw kon ang rason mao lamang ang usa ka kaso nga gikalambigitan sa mga sakop niini diin mao ang pagpangdagit ni Enrique Fernandez III dili kini lawom nga rason nga i-relieve si Cariaga tungod kay iyang nakita nga aduna kini gipanghimo nga lakang.
“Dili man pod tanan polis dautan at least ilang gipakita nga nadakpan ilang kaugalingon nga kauban,” butyag niini.
Isip maoy nangulo sa mga negosyante daw ilang nakita nga gidakop ilang kaugalingon nga sakop ug wala niini gipanalipdan.
Wala silay nakita nga biases nga gihimo ni Cariaga ug gani kini mismo ang nag-initiate nga ang National Bureau of Investigation maoy moimbestigar nga sakto sab nga gihimo niini.
Gipasabot usab niini nga ang krimen anaa kanunay ug isip negosyante daw ilang gakabalak-an ang mga susama niining insidente.
Dugang usab niini nga maayo ilang communication sa kapolisan ug awhag niini sa mga konsehal nga misugyot nga hulipan si Cariaga.
“Let’s give him a chance. Labina bag-o pa, sayo kayo nga pulihan siya,” butyag niini ug gidayeg usab niining ang kalampusan niini labina sa pagsugpo sa illegal gambling ug droga.
Daw alang kanila mga negosyante bout pa nilang mahatagan og tsansa si Cariaga nga magsilbi ug confident pa sa performance niini.
Samtang sa iyang bahin ni Police Regional Office Deputy spokesperson Mardy Hortillosa, gibutyag niini nga wala pay desisyon si Regional Director Noel Constantino sa sugyot nga i-relieve sa pwesto si Cariaga.