KIDAPAWAN CITY - Nag-unay og pinusilay ang grupo sa duha ka mga kumander sa Moro Islamic Liberation Front (MILF), alas 7:20 sa buntag niadtong Lunes, Nobyembre 21, didto sa probinsiya sa Cotabato.
Sumala ni North Cotabato Provincial Police Office Director Emmanuel Peralta nga ang nagka-engkuwentro mao ang grupo tali nila ni Kumander Butuh Mantol ug Kumander Ricky Husain didto sa utlanan sa Barangay Inug-og, Pikit, Cotabato ug Pagalungan, Maguindanao Province.
Ang giyera nga milungtad og duha ka oras mikalas og duha ka kinabuhi samtang laing duha sab ang nangasamdan.
Nasayran nga sila si Kumander Mantol ug Kumander Husain pulos sakop sa MILF apan nagkaaway gumikan sa personal nga dumot sa matag pamilya gumikan sa yuta nga giugmad.
Nahunong lang ang engkuwentro sa diha nga nahiabot ang MILF Ceasefire Committee ug mga miyembro sa International Monitoring Team (IMT), mga Muslim elders ug mga lokal nga opisyal sa Pikit nga gipangulohan ni Mayor Sumulong Sultan ug Pagalungan Mayor Datu Salik Mamasabulod.
Nasayran nga dugay na untang nahusay ang dumot apan subling nagkagubot human nga ang duha ka grupo nga pulos milapas sa ilang nasabutan.
Tungod niini, daghang mga pamilya ang namakwit ug di pa mobalik sa ilang mga panimalay sa kabalaka nga subling magka-engkuwentro na sab gumikan anaa lamang sa palibot ang mga grupo.