MANAKOP na sa mosupak sa jaywalking ang City Transport and Traffic Management Office (CTTMO) sugod Disyembre 1 ning tuiga.
Si CTTMO Chief Rhodelio Poliquit nagbutyag nga sugod sa maong adlaw modakop na sila sa mga jaywalkers kinsa bisan asa lamang motabok sa kadalanan sa dakbayan sa Davao.
“Manakop gayud mi, mo-focus ta didto sa atong mga pedestrian overpasses,” sulti ni Poliquit nga nahinabi sa SunStar Davao SuperBalita pinaagi sa telepono Martes, Nobyembre 22.
Mga pedestrian overpasses nga bantayan sa CTTMO mao ang Matina Crossing, Mc Arthur Highway duol sa University of Mindanao (UM-Matina Campus), Bankerohan, Jose P. Laurel Avenue, Lanang ug flyover sa Agdao, Davao City.
Ipatuman kini sa CTTMO subay sa City Ordinance 778 kon The Comprehensive Transport and Traffic Code of Davao City.
Sumala ni Poliquit ang mga madakpan nga malapason dunay silot nga upat ka oras nga community service (manlimpyo sa palibot) ug multa nga P200.
“Atoa pa nga i-finalize ug subayon pa ang ubang mga sanctions niini nga balaod,” ingon ni Poliquit.
Dugang sa opisyal nga makatabang sab kini nga malikayan ang disgrasya nga mabanggaan ang mitabok ug ang trapiko gumikan posibleng mohunong ang sakyanan sa pagtabok sa di husto nga lugar.
Ang opisyal naghanyo sa tanang Dabawenyo nga mosunod lamang sa balaod nga moagi gayud sa mga pedestrian lane ug pedestrian overpass.
“Motuman lang ta kay kaayohan ni nato, aron malikay ta sa disgrasya,” dugang ni Poliquit.