DAGHAN gihapon ang nangutana kanato kon hain ang mas maayo, legal separation o annulment? Angay natong masayran nga sa legal separation, gihimong legal ang panagbuwag sa magtiayon apan pabilin sila kasado sa usag’usa busa di sila mahimong magminyo pag-usab.
Sa laing bahin sa annulment, gibugto ang talikala sa kaminyuon, busa mahimong magminyo pag-usab kadtong magtiayon kansang kaminyuon, gianular na sa hukmanan human sa usa ka bista.
Alang sa katin-awan sa tanan, atong sublion ang mga sukaranan sa legal separation ubos sa Family Code of the Philippines. Mao kining mosunod:
Ang sigeg pagbun-og o pag-abuso sa kapikas batok sa petitioner, sa ilang anak o sa anak sa petitioner; Pagbun-og o paggamit sa moral pressure aron pagpugos sa petitioner mga mobalhin og relihiyon o political affiliation;
Pagsuway sa kapikas sa pagdani sa petitioner, sa ilang anak o anak sa petitioner nga mosulod sa prostitution o makigkonsabo sa lain aron pagdani kanila nga mosulod sa prostitution; Kon ang kapikas gipahamtangan sa silot nga pagkabilanggo og labaw sa unom ka tuig ug final na ang maong hukom, bisan pa kon nakadawat kini og pardon;
Pagkalulong sa drugas o grabeng pagkapalahubog sa kapikas; Pagkatomboy o pagkabayot sa kapikas; Kon ang kapikas misulod sa usa ka bigamous marriage, dinhi sa Pilipinas o sa gawas sa nasud;
Sexual infidelity or perversion, ang pagkamaluibon o sobrang kahigal; Pagsuway sa kapikas sa pagpatay sa petitioner; Pag-abandonar sa kapikas sa way igong hinungdan sulod sa kapin sa usa ka tuig.
Busa angayan usab nga timan-an kon unsa ang sukaranan alang sa legal separation ug sukaranan alang sa annulment.
Apan ang uban nag-agwanta lang sa ilang kahimtang, ilabi na sa mga bana nga under-de-saya. Labi na karon nga ang mga bag-ong balaod pulos pabor sa mga babaye. Kay ang unang mga balaod pabor man sa mga lalake, ilabi na mahitungod sa sexual infidelity. Karon, ang mga asawa o bisan kapuyo lang, modangop dayon sa balaod nga nanalipod sa kababayen-an ingon man sa ilang mga anak.
Apan kon mapriso na gani ang ilang bana o kapuyo, sila mismo ang magpakiluoy sa kapulisan nga buhian kini kay way laing mangitag panginabuhian sa pamilya. Maayo lang kining maong balaod niadtong mga adunahan.
Ang mga kabus mag-agwanta na lang. Kay tinuod man, kon mapriso ang bana, kinsa pa man ang mobuhi sa pamilya, labi na kon way pangita ang asawa?
Daghan sab ang mga bana nga moreklamo nga kon sila maoy kastiguhon sa ilang asawa, kutob ra gyud sa physical injuries ang ilang kiha. Apan tagsa ra sab ang bana nga mokihag asawa kay daghan ang mga banang under-de-saya.
Sa miting sa pundok sa mga bana, ang ilang tsirman niingon nga bahinon sila sa duha ka grupo - sa wala kadtong mga under-de-saya ug sa tuo kadtong di. Usa ray isog nga nibarog sa lugar sa di under-de-saya. Gipasalamatan siya sa ilang tsirman sa iyang kaisog, apan niingon ang maong bana, “Ang akong asawa maoy pasalamati tsirman kay siyay nagtukmod nako diri.”
(Ang atong paghisgut-hisgot mahitungod sa balaud madungog na matag karon ug unya sa mga tampo nga dunay punto legal ngadto sa tulomanon nga “Alang Kanimo Kapuso” nga gisibya gikan sa ala-una ngadto sa alas dos sa hapon sa sibyaan DYSS Superadyo sa RGMA network.)