3 ka mananagat naluwas

NALUWAS ang tulo ka mga mananagat human naglutaw-lutaw sulod sa siyam ka oras sa kadagatan sakop sa Island Garden City of Samal (Igacos) sa Davao del Norte.

Si Naval Forces Eastern Mindanao Deputy Public Affairs Officer Ensign Eunice Fe Sabado nagbutyag nga naluwas ang tulo ka mananagat alas 6:10 sa buntag niadtong Martes, Nobyembre 22.

Ang mga mananagat mao sila Soy-an Osani, 47, Jamir Osani, 20 ug Henry Everre, 17, pulos nagpuyo sa Purok 3, Isla Verde, Barangay 23-C, Poblacion District, dakbayan sa Davao.

Sumala ni Sabado nga human nahipos sa tulo ang ilang mga kuhang isda dunay dakong balod nga mihapak sa ilang banca dayon nayabo sila.

“Paalis na sana sila at na-arrange na nila sa lalagyan ang huli nilang mga isda, then suddenly may malaking alon at nabaliktad ang bangka nila sa lakas ng impact,” sulti ni Sabado nga nahinabi sa SunStar SuperBalita pinaagi sa telepono niadtong Miyerkules.

Mokabat sa siyam ka oras silang naglutaw-lutaw sa kadagatan samtang naggunit sa ilang nakulob nga banca.

“Mga Tausog tribe sila na nananalangin sila na may makadaan sa kanila at yun nadaan sila while nag-patrolling ang BRP Nicolas Mahusay Patrol Boat 119 around 6:10 a.m.,” ingon ni Sabado.

Hinuon, anaa sa luwas nga kahimtang ang tulo ka mananagat kinsa daling gidala sa Naval Station Felix Apolinario sa Panacan, Davao City aron sila hilingon ug papahuwayon.

“Okay naman sila, at umuwi sila after sila naka-rest,” sulti ni Sabado.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph