MOBALOR og P1 milyon nga peke sa humot nga sabon ang nasakmit sa Detective Management Desk (DMD) uban sa City Public Safety Company (CPSC) pulos special unit sa Cagayan de Oro City Police Office (Cocpo) atol sa operasyon diha sa merkado sa Cogon adlawng Martes mga alas 10:30 sa buntag.
Gibutyag sa hepe sa DMD nga mao si Police Chief Inspector Jason Sto. Domingo nga sa wala pa sila mikuha og search warrant batok sa tindahan nga SKO Merchandising aduna pa silay gihimo nga pagtuki o test buy kung unsa ka tinuod ang mga report nga namaligya og mga pekeng sabon.
Unang mireklamo ang Procter and Gamble Corporation kinsa maoy orihinal nga ga prodyos sa sabon nga safeguard.
Usa ka sakop nila ang nagpatoung buyer ug positibong peke ang napalit nga sabon hinundan gisilbi dayon ang search warrant sa maong tindahan.
Nakumpiska ang safeguard nga sabon nga mokabat sa 192 ka karton diin moabot kini sa dul-an 60 mil kabouk.
Gipanag-iyahan ang maong tindahan nila ni Cecile Daclag ug ang partner niining usa ka chinese national nga si Chen Rui Kun Li kinsa wala atol sa operasyon.
Dugang ni Sto. Domingo nga mamatikdan nga peke ang sabon tungod kay dili kini kaayo humot ug labihan ka gahi. Ang manufacture date usab niini nakabutang nga 2018 imbes nga 2016.
Ang mga nanag-iya niini posibleng mag-atubang og kaso kasupakan sa Republic Act (RA) 8293 o Copyright Infringement.
Usa ka kunsumidor nga si Rowella Hinayon nibutyag sa Sun.Star SuperBalita nga daw biktima siya sa maong pekeng sabon.
"Ako pod lage kay gapangyawat kay barato lang ug gaingon pa gyod sila nga over runs nga sabon mao barato, sus peke man diay. Mao diay walay baho ug murag bato," butyag niini sa interbyu sa SuperBalita.