GIINTERBYU sa New Orleans Pelicans ang beteranong coach nga si Jeff Van Gundy alang sa bakanteng posisyon sa team, matod pa sa usa ka tinubdan.
Ang tinubdan mibutyag niini sa The Associated Press sa kondisyon nga dili siya panganlan gumikan kay gitago pa kini sa Pelicans.
Matod sa tinubdan nga bisan usa ka kandidato sa posibleng mohulip sa puwesto ni Monty Williams, wala’y gibutyag ang Pelicans.
Si Williams gitaktak sa Pelicans niadtong Mayo 12 human natagak ang team sa NBA playoff.
Ang Pelicans nagtinguha nga makakuha og coach nga makahatag kanila og maauong kaugmaon hilabi na karon nga sakto na sila sa puwersa.
Si Van Gundy adunay rekord nga 430-318 dihang nag-coach siya sa New York Knicks ug Houston Rockets.
Sa laing bahin, mismong si Golden State Warriors coach Steve Kerr ang mibutyag nga giinterbyu sab sa Pelicans ang iyang assistant nga si Alvin Gentry. (AP)