BARUGO, Leyte - Di mominus sa 700 ka mag-uuma sa Leyte ang nanag-iya og yuta.
Kini human madawat ang Certificate of Land Ownership Award (CLOA) gikan sa Department of Agrarian Reform (DAR).
Mismo si Secretary Rafael Mariano atol sa iyang pagbisita sa Eastern Visayas ang mitunol sa CLOA ngadto sa 783 ka mag-uuma gikan sa lima ka lungsod.
Gilangkuban kini sa lungsod sa Alang-Alang, Barugo, San Miguel, Jaro ug Carigara.
Base sa datos, mas daghan ang nakadawat sa San Miguel diin dunay 245 ka benipisyaryo ug 321 ka CLOA alang sa 233 ka ektaryang yuta.
Gisundan kini sa Barugo nga dunay 222 ka benipisyaryo ug 398 ka CLOA alang sa 280.1 ektaryang yuta.
Sa Jaro, Leyte dunay 147 ka benipisyaryo ug 230 ka CLOA alang sa 684.6 ektaryang yuta.
Samtang sa Carigara, Leyte dunay 123 ka benipisyaryo ug 102 ka CLOA alang sa 129 ektaryang yuta.
Labing gamay ang lungsod sa Alang-Alang nga dunay 46 ka benipisyaryo ug pito ka CLOA alang sa 100.6 ektaryang yuta.
Matod ni Lolita Candaza, usa sa mga benipisyaryo, nalipay sila sa kalambuan gumikan kay maka-avail na sila sa tabang sa local ug international non-governmental organization alang sa mga Yolanda survivor.
Matod ni Mariano nga naninguha karon ang iyang administrasyon nga makahimo og national land acquisition and distibution action team aron mapadali ang proseso sa land distribution.
Gitutokan usab karon sa DAR ang problema sa reconstitution sa mga CLOA nga naapektohan human masunog ang Registry of Deeds sa Palo, Leyte niadtong dekada 90. (JKDP)