MIDSAYAP, North Cotabato -- Gikanyon sa mga otoridad ang notoryus nga drug lord alas 10:15 sa gabii niadtong Sabado.
Gibutyag ni 602nd Brigade commander Colonel Nolly Samarita nga nasiplatan sa mga sundalo ang grupo ni Toks Masgal, alyas "Kumander Mabrox", sa utlanan nga parte sa Midsayap, North Cotabato ug Datu Piang, Maguindanao.
Gisundan dayon kini sa mga otoridad nga nagpahigayon og anti-drugs operation apan naglisod sila sa pagsulod sa Liguasan Marsh tungod gabii ug lig-on ang posisyon sa mga rebelde.
Gamit ang 105 mm Howitzers Cannon, gipabuthan og tulo ka bala ang grupo ni Kumander Mabrox nga paryente sab ni Barangay Lomopog, Midsayap Kapitan Renz Tukuran, nga pulos nalambigit sa drug trade sa North Cotabato ug Maguindanao.
Nabungkag ang gitaguan ni Kumander Mabrox apan dili matino kung napatay ba siya o samaron sa mortar shelling sa mga sundalo.
Ang Moro Islamic Liberation Front (MILF) Joint Adjoc Action Group ang mitabang na sa military ug kapolisan sa paglutos kang Kumander Mabrox .
Ang grupo ni Kumander Mabrox giingon nga maoy nagprotekta sa mga narco-politicians sa North Cotabato ug Maguindanao.
Sa kasamtangan, nakig-alayon na si Toks Masgal sa Bangsamoro Islamic Freedom Fighters ug ubang armadong grupo sa Maguindanao ug North Cotabato. (Edgar Fuerzas)