GIBUTYAG sa epidemiologist sa Regional Epidemiology and Surveillance Unit (Resu) 7 Rennan Cimafranca nga maisip na nga diarrhea outbreak ang 57 ka mga kaso sa kalibanga sa lungsod sa Malabuyoc.
Si Cimafranca nagkanayon nga wala sila’y nadawat nga taho gikan sa Provincial Health Office kabahin sa mga kaso sa maong lungsod.
Dugang niini nga nakadawat sila og report gikan sa Malabuyoc District Hospital niadtong unang duha ka semana sa Nobyimbre apan walo lang ka kaso kini nga na-admit sa tambalanan.
Sa text message ni Dr. Rene Catan, ang pangu sa PHO, sa Superbalita Cebu nibutyag nga kining 57 ka mga kaso ilang natala nga nagkalibanga human ang usa ka water system sa lungsod taas ang e-coli o kagaw sa tubig.
Hinuon, base sa taho nasulbad na ang problema sa kalibanga sa Malabuyoc human niaksyon ang lokal nga kagamhanan niini.
Dugang ni Cimafranca nga base sa mga natala nila karong tuiga wala pa sila’y nadeklarar nga outbreak sa diarrhea sa tibuok Central Visayas.
Wala usay grabe nga kaso nga natala ang Resu 7 kabahin niini nga sakit.
Gibutyag ni Cimafranca nga panagsa nalang ang kaso sa diarrhea sa Central Visayas tungod kay limpyo ang mga tinubdan sa tubig niini.
Tambag niini sa tanang residente nga aron siguro kinahanglan pabukalan ang tubig sa dili pa kini imnon o kaha butangan kini og disinfectant aron mamatay ang kagaw niini ug dili kini makaingon sa kalibanga.
Kahinumduman nga aduna’y 147 ka kawani ang nangasakit ang tiyan ug nagkalibanga sa usa ka kompaniya sa dakbayan sa Danao niadtong nakalabay nga tuig tungod usab sa kagaw sa giinom niini nga sago’t gulaman.
Ang Resu 7 andam moabag sa lokal nga kagamhanan kon nanginahanglan kini og tambal gikan sa kanila.