SUGOD karong Huwebes, Disyembre 1, ang Davao City Transport and Traffic Management Office (CTTMO) manakop na sa mga malapason sa Anti-Jaywalking Ordinance ning dakbayan.
Si CTTMO Chief Rhodelio Poliquit nagbutyag nga sugod karong adlawa, manakop na sila og mga jaywalkers kinsa mitabok sa di hustong lugar sa
mga nag-unang kadalanan sa Davao City.
"Sugdan na nato og dakop ang mga malapason, December 1 [karong adlawa] nato ni ipatuman," sulti ni Poliquit nga nahinabi sa SunStar SuperBalita.
Ang CTTMO mo-pukos una sa mga pedestrian overpasses nga mao ang Matina Crossing, Mc Arthur Highway sa Bangkal ug ang overpass duol sa University of Mindanao (UM-Matina Campus), Bankerohan, Jose P. Laurel Avenue, Lanang ug flyover sa Agdao, Davao City.
Ang Anti-Jaywalking Ordinance nakalatid sa City Ordinance 778 kon The Comprehensive Transport and Traffic Code of Davao City.
Una nang napahibalo ni Poliquit nga ang mga madakpan nga malapason dunay silot nga upat ka oras nga community service (manlimpyo sa palibot) ug multa nga P200.
"Subayon pa nato ang ubang mga sanctions niini nga balaod, aron maoy mapahamtang nato sa mga masinupakon,” ingon ni Poliquit.
Ika-duhang semana sa Nobyembre ning tuiga, ang CTTMO naghimo og eksperimento labot sa mga designated areas sa loading ug unloading areas.
Dinhi, ang mga drayber sa mga Public Utility Vehicles (PUV) ug Public Utility Jeepneys (PUJs) mohunong lamang sa mga designated area alang sa ilang mga circulatory routes.
Human niini, gipatuman pag-usab ang Anti-Jaywalking Ordinance aron makita ang resulta sa eksperimento sa CTTMO isip tubag sa trapiko ug wala damha nga disgrasya sa pagtabok sa mga pedestrian.
"Motabok gayud ta sa mga pedestrian lanes nato aron, safety ta, ug diha sa mga pedestrian overpass. Motuman lang ta kay kaayohan ni nato, aron malikay ta sa disgrasya," pahimangno ni Poliquit.
Kahinumdoman, niadtong dekado 1990's gipatuman ang "Hapsay Dalan" sa dakbayan diin daghang mga masinupakon sa Anti-Jaywalking ang nadala sa mga presinto sa kapolisan.