Dili dayon motuo bahin sa milagro: Msgr. Binghay

DILI angay magdalidali og tuo ang mga tawo nga milagro gikan sa Ginuo ang susama og porma nga imahe sa Santo Niño sa bayanan sa usa ka bao, sumala sa usa ka opisyal sa artsidyosesis sa Sugbo.

Si Msgr. Esteban Binghay, episcopal vicar sa artsidyosesis, namahayag nga ang problema sa mga Romano Katoliko kay dali ra motuo sa mga butang nga makit-an sama sa paglakra sa imahe sa Ginuo sa usa ka butang o ang pagporma sa imahe sa Santo Niño sa bayanan sa bao.

“So, atong i-close ang atong hunahuna nga nagmilagro ang Ginuo nga si Señor Santo Niño nga molakra lang, mopakita o mogawas sa bukobuko sa bao,” pahayag ni Binghay sa Superbalita Cebu.

Matod niya nga ilusyon lang kini sa tawo ug dili mao ang reyalidad.

Ang mga tawo ningdagsa sa usa ka balay sa Barangay Suba, siyudad sa Sugbo nga nagbuhi sa bao diin naporma ang imahe sa Milagrusong Bata.

Si Fe Mangubat, ang nagbuhi sa bao nga ginganlan og “Niño Turtle” kuyog sa laing bao nga si “Ninja,” nga 16 ka tuig na.

Niadtong Lunes, nabantayan sa iyang pag-umangkon nga si Rizelda Igot ang imahe sa Santo Niño dihang gigawas ang mga bao sa balay.

Si Mangubat pagkakita niini nakugang dihang nabantayan ang mao nga imahe.

“Nanlimbawot ang akong balhibo pagkakita ato. Nakapanguros gud ko,” asoy sa ginang.

Ang bao nga si Niño Turtle hinatag sa amiga sa iyang anak nga lalake nga tua na ni-migrate sa laing nasod walo ka tuig na ang nakalabay.

Ang mga tawo nidagsa sa balay ni Mangubat, diin ang uban niini mohikap o mokuha sa tubig nga gibutang sa planggana nga gipahimutangan sa duha ka mga bao ug gipahid sa ilang lawas o gitambal.

Si Binghay nidugang nga dili dayon angay motuo ang mga tawo nga makaayo ang tubig nga gikan sa planggana nga gipahimutangan sa mga bao.

“Ang Ginuo ra ang makaayo. Ampo sa Ginuo, dili diha sa bao...Dili isalig sa mga butang (ang kaayohan sa sakit),” dugang ni Binghay.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph