GISAGPA ug giingnan nga bastos ni Konsehal Zaldy Ocon ang usa ka traffic enforcer human kini gi-isyuhan og ticket gumikan sa paglapas sa balaod sa trapiko niadtong Huwebes, Disyembre 1, alas 10 sa buntag sulod mismo sa City Session Hall, dakbayan sa Cagayan de Oro.
Ang pagpanagpa kang Ric Emmanuel Agustin, 23, ulitawo, residente sa Xavier Heights, Upper Balulang ning dakbayan, ug sakop sa Roads and Traffic Administration (RTA) nga na destino sa Yacapin-Guillermo Streets ning dakbayan saksihan nila lawyer Edgardo Uy ug engineer Nonito Oclarit.
Sa impormasyon gikan sa Police Station 1 sa Divisoria, nagpatala si Agustin sa kapolisan human gitambagan ni Uy.
Gidugang pa nga nagsumikad ang maong panagbangi sa dihang giisyuhan sa kauban sa biktima si Ocon og citation ticket nga unattended human naaktohang nakaparada ang sakyanan niini sa yellow box o sa adunay traffic sign nga loading ug unloading.
Giingong gikasuko kini ni Ocon gani gikumot ug gilabay sa iyang atubangan ang maong ticket ug dayong lakaw niini giingong gisinggitan pa kini nga putbolon gumikan kay bastos.
Nasayran usab nga mi-adto ang biktima sa City Hall aron nga i-settle ang maong kaso apan nakurat na lamang kini dihang kalit lang nga gisagpa atubangan mismo sa nila ni Uy ug Oclarit.
Samtang dihang gihinabi sa ABS-CBN si Ocon gibutyag niini nga iyang na nga giandam ang pagpatanggal kang Agustin sa serbisyo.
Dihang gipangutana kong nga naka-ingon siya nga arogante si Agustin igo lang kining niingon nga “basta arogante, bastos.”
Sa pagkakaron, nakatala na sa buhatan sa kapolisan sa Police Station 1 ang maong insidente samtang giingong adunay pagahimoon nga imbestigasyon sa Blue Ribbon committee sa konseho.