ONSE ang samaron human madisgrasya ang mobile patrol sa kapulisan sa Calinan Police Station ubos sa Davao City Police Office (DCPO) alas 9:40 Biyernes sa buntag, Disyembre 1, sa Purok 2, Barangay Joaquin, Calinan District, dakbayan sa Davao.
Lima ka piniriso, upat ka pulis, usa ka drayber, ug usa ka empleyado sa City Social Services and Development Office (CSSDO) ang gipangdala sa Southern Philippines Medical Center ug anaa na sa luwas nga kahimtang.
Subay sa impormasyon gikan kang DCPO spokesperson Catherine dela Rey, nasayran nga nawad-an og kontrol ang drayber nga si Rodrigo Zamora sa iyang gimaneho nga Mobile Patrol 34.
Ang Mobile Patrol 34 sa Calinan Police Station uban sa mobile crew nga si Police Officer 1 Alex Gallo ug gigiyahan nila Senior Police Officer 2 Cagaanan, Police Officer 3 Cenabre, ug Police Officer 1 Tripoli uban ang lima ka mga piniriso nga ila na untang dalhon sa korte alang sa inquest proceedings ug medical examination.
Nasayran nga sa kakusog sa dagan sa mobile patrol nawad-an kini og kontrol dayon nadasmag sa poste sa Davao light and Power Company.
Sa kakusog sa impak, mituyok kini og nabalhin sa pikas linya ug nabunal sa punoan sa lubi hinungdan nga nangasamad ang mga sakay lakip na ang usa ka Ceejay Autida personahe sa CSSDO.
Giimbestigahan na sa kapulisan sa Calinan ang maong hitabo.