Super Pista: Mangga Festival sa Kalunasan

ANG Mangga Festival sa Kalunasan, Cebu City gisugdan niadtong 2011. Ang lugar nabantog isip tinubdan sa mangga nga Carabao nga maoy giila nga labing lami nga klase sa mangga. Kanhi sakop ang Kalunasan sa Barangay Guadalupe apan tungod sa kadako sa sityo gibuwag kini.

Saulugon kini nila matag buwan sa Mayo isip pasalamat sa maayong kita ug ani nga naghatag og panginabuhian sa mga lumolupyo.

Karon sa ilang ika-upat ka tuig, padayon nga nagmalambuon ug mabulokon ang kalihokan bisan pa man sa mga kakulian sama sa kahagip-ot sa lugar diin gipasundayag ang kalihokan.

Gisalmotan sa siyam ka mga contingent ang Mangga festival nga gitipun-tipon gikan sa kapin 30 ka mga sityo. Ang matag contingent gilangkoban og di molapas sa usa ka gatos ka mga partisipante ug sila anaay P15,000 nga budget gikan sa Cebu City Government.

Gawas niini, nagtambaya­yong u­­sab ang mga residente sa matag sit­yo sa pag-abag sa mga gastuhan sama sa props ug pagkaon sa mga dancer.

Gikuronahan isip Mangga Festival queen si Genevive Reyes, 15, tinun-an sa Oppra National High School nga maoy mirepresentar sa Unit 1, naangkon usab niya ang Best Solo Performer Award. Nahimong 1st runner up mao si Agnes Marie Monares nga nakaangkon sab sa titulo nga Best in Festival Costume ug nalangkat sa ilang grupo ang Best Group Performance samtang 2nd runner up ang festival queen sa Tribu Larehanon nga si Maria Ciony Maslog.

Ang Unit 5 o Lumad Singko maoy grand winner sa ritual showdown category nga nakaangkon sa cash prize nga P50,000. Gideklarar usab ang Lumad Singko isip Best in Choreography.

Ang Tribu Larehanon nahimutang sa ikaduhang dapit diin nakaangkon sa P30,000 isip premyo ug anaa sa ikatulong dapit mao ang Unit 1 nga maoy kampyon sa miaging tuig.

Midaog sa street dancing category ang Unit 1 gisundan sa Unit 5 ug anaa sa ikatulong pwesto ang Sobusteha.

Usa ka mabdos nga nangala og mangga, ang usa sa mga nindot nga gipakita sa Lumad Singko nga maoy nagdala nila sa kadaogan. Napadayag usab sa mananaog ang bili sa mangga ngadto sa mga tawo.

Ang overall chairman sa mangga festival nga si Konsehal Marvin Leyson nagkanayon nga nahimong malampuson ang kalihokan tungod sa pagkahiusa sa mga opisyales gipangulohan sa ilang kapitan sa barangay inabagan sa mga sponsor nga nitabang kanila.

Si Kalunasan Barangay Kapitan Nu­nilon Monares Jr. nagkanayon nga mas daghan karon ang misalmot sa kalihokan kompara sa mga niaging tuig. Mas grabe usab ang ilang preparasyun aron mas monindot pa ang naasoyng festival.

Nagsadya sa ilang kadaogan ang Unit 5 ilabi na ang ilahang choreographer nga si Mark Angelo Romeo.

u201cUnexpected kaayo ni kay wa mi nag-aim nga makadaog ilabi na nga daghan kaayo mi og kakulian while nag-practice mi.This is my first time here in Mangga Festival. Dako among pasalamat sa Ginoo nga nakadaug mi,” matod niya.

Atol sa pakighinabi sa Sun.Star Superbalita kang Romeo, siya midugang nga tulo ka semana ang ilang preparasyon ug naglisod sila sa pagpangita og lugar nga adto sila mag-practice.

Nagkanayon usab siya nga ang sekreto sa ilang kadaugan mao ang determinasyon ug kakugi sa mga bata inubanan sa pag-ampo ngadto sa Kahitas-an. (Faith V. Leceña, Marjorie D. Padin, Julie Ann V. Pantallano ug Joanna Marie A. Tejas, CNU Communication Interns)

Trending

No stories found.

Just in

No stories found.
logo
SunStar Publishing Inc.
www.sunstar.com.ph