MALAMPUSONG gipahigayon sa Task Force (TF)-Davao ang ilang gift-giving, medical ug dental mission didto sa Ramon Magsaysay Park, dakbayan sa Davao kagahapon.
Si TF-Davao spokesperson Captain Mario Tena nagbutyag nga mokabat sa 1,000 ka residente ang nahimong benepisyaryo sa ilang gift-giving nga gilangkuban sa 567 ka tawo sa medical check-up ug 137 ang naibtan og ngipon, 220 ka mga residente nga nakadawat og mga gift items ug physical examinations.
Mga benepisyaryo sagad gikan sa Barangay Leon Garcia, Agdao District ug Barangay 27-C, Poblacion District, nga duol lang sa TFD Headquarters.
"Masaya sila at walang mapagsidlan sa kagalakan na nakatanggap sila ng mga regalong pamasko at serbisyo na galing sa puso," butyag ni Capt. Tena.
Ang kalihukan giubanan sa Davao City Mabuhay Lions Club, Kiwanis Club of Davao City, Davao Kaisa Foundation, Inc. ug Philippine Chinese Chamber of Commerce.
Mokabat sa 64 ang mibulontaryo nga mga military dental ug medical doctors gikan sa Naval Forces Eastern Mindanao Dental Dispensary, Camp Panacan Station Hospital, ug 10th Forward Support Medical Company sa 10 Infantry Division.
Misalmot sab ug mipaambit sa ilang serbisyo ang Philippine Pharmacists Association of the Philippines (Davao Chapter), mga tinun-an sa Pharmacy sa San Pedro College ug Mindanao Medical Foundation College.
Ang TF-Davao di lang kauban sa pagbantay sa palibot alang sa kalinaw kon di kauban sab sa paghatag og serbisyo sa katawhang Dabawenyo. (JPC)