DILI madayon ang concert sa Air Supply sa Cebu karong gabii, Martes, Dec. 6 tungod sa pagkasakit sa ilang singer nga si Russell Hitchcock.
Nakanselar usab ang ilang concert niadtong Sabado, Dec. 3 sa Kasablanka Hall, Mall Kota Kasablanka, Jakarta. Hangtod karon walay gibutyag unsay sakit sa 67-anyos nga singer nga naka-confine karon sa ospital. Ang gisulti lang na-over fatigue si Hitchcock.
“Air Supply is forced to cancel their Southeast Asia Tour due to doctors’ orders because of the physical exhaustion of Russell Hitchcock, we are working to reschedule as soon as possible,” matod sa official statement sa kampo sa Air Supply.
P200 million
Hangtod karon padayong nanghakot sa box office ang “The Super Parental Guardians” ni Vice Ganda nga mokabat na sa P200 million ang kita in less than a week.
Niadtong Dominggo puros jampacked ang duha ka mga sinehan sa SM Consolacion nga nagpasalida og Super Parental Guardians.
Medyo taas lang salidaha kay 1 hour and 54 minutes. Nakataas ang fight scenes ni Coco Martin batok sa gang ni Joem Bascon. Hasta si Baron Geisler kalit lang nigawas sa dayong hinapos nakigrambol ni Kiko Matos.
Typical siya nga Tagalog movie. Kon fans ka sa teleseryeng “Ang Probinsyano” ug ni Vice Ganda, siguradong matagbaw ka og kinatawa aning salidaha.
“Meant to be”
Jampacked sad ang duha ka mall shows sa Cebu niadtong Sabado, Dec. 3 sa cast sa upcoming GMA Telebabad series Meant To Be.
Akong nahimamat ang best actress ug drama sweetheart Barbie Forteza nga sikat karon isip impersonator ni Kris Aquino sa Sunday Pinasaya. Buotan rang bataa ug daghan sa taga-press ang ganahan niya.
Kauban ni Barbie sa mall show ang iyang co-stars nga silang Jak Roberto, Addy Raj ug Ivan Dorschner nga klarong mga bagito pa kumparar ni Barbie nga abtik manabi.
Sssuper ka!
Laysho ang Barbie Forteza kay upat ang iyang leading men sa Meant To Be. Ang ikaupat si Ken Chan nga wala nakauban sa ilang promo tour tungod sa prior commitment kuno sa Manila. Gipangutana sa press si Barbie kon kinsa sa upat ang meant to be niya?
“Hindi rin namin alam kasi ibabase nila sa comments at reactions ng mga manonood kung sinong gusto nila. Alam mo naman ang social media ngayon napaka-powerful,” dason pa sa 19-anyos nga aktres.
Si Barbie duha ra diay silang managsuon ug nag-eskwela siya karon og kursong Psychology. Basaha ang atong chika ugma niya sa Sssuper Ka kay daghan siyang rebelasyon.
Ang Meant To Be isalida sa Enero, 2017.
Niel Coleta
Ang Kapamilya star nga si Niel Coleta ang celebrity guest sa ribbon cutting ug grand opening sa bag-ong sanga sa ML Express Kwarta Padala sa White Gold Club. Gikan sa opening, nidiretso ang aktor sa Pizzerria Michelangelo sa Time Square, diin ako siyang naka-one-on-one.
Gawas ni Coleta, nitambong usab ang 2013 Miss Mandaue Steffi Rose Pearson Aberasturi ug ang tag-iya mismo nga si Senyorito Michel Lhuillier kauban ang yaya ng mga artista, Ms. Aida Patana.
Christmas tree
Niadtong Dec. 1 gitapuk-an sa bagang-duot sa mga Cebuano ang tradisyonal nga pagpasiga sa kinatas-ang 125-foot Christmas tree didto sa Fuente Osmena.
Bisan walay bonggang fireworks apan gisugat gihapon sa tumang kahinam ug kamaya ang makasaysayanong pagbukas sa Pasko sa Sugbo.
Ang gitawag nga Christmas Tree of Hope gipahimo sa magtiayong Senyorito Michel ug Dr. Amparito Lhuillier niadtong tuig 2000 pa isip pasalamat ug yukbo nila ngadto sa mga Cebuano. Ug kay 18 days na lang, Pasko na, advance Happiest Christmas natong tanan!