TAGBILARAN CITY, -- Human sa Community Fish Landing Center (CFLC) sa Inabanga, itugyan na usab sa kagamhanan ang laing pito pa ka bagsakanan sa isda sa mga lungsod sa Bohol.
Kini ang gipahibawo sa Bureau of Fisheries and Aquatic Resources (BFAR) pinaagi ni Fishery Officer Pedro Milana Jr.
Sa Kapihan sa Philippine Information Agency, gibutyag sa BFAR nga sa 2016, 8 ka tag P3 milyones nga bagsakanan sa isda alang sa gagmay nga mga mananagat ang nakuha sa Bohol, pinaagi sa abag sa mga lokal nga kagamhanan.
Una nang gidawat sa kagamhanan ug gagmay nga mga mananagat sa Inabanga ang CFLC nga gipatukod human mihatag ang lungsod sa luna alang sa gambalay sulod sa merkado publiko sa Inabanga.
Sa sunod nga mga adlaw, itugyan sa BFAR, pinaagi ni Regional Director Allan Poquita ang CFLC sa Tubigon.
Gawas sa Inabanga ug Tubigon, nakadawat usab ang mga lungsod sa Anda, Ubay, Clarin, Calape, Carlos P. Garcia ug Baclayon sa samang multi-million nga proyekto. PIA 7-Bohol