TUNOK sa ugmarong kalamboan maoy silbing gumonhap sa New Cebu Interntional Container Port sa Tayud, Consolacion nga joint venture tali sa lungsod ug Mega Harbour Development nga mobobo og P16.4B pinaagi sa Public-Private Partnership (PPP). Mireklamo ang Cebu Ports Authority (CPA) nga sila maoy dunay katungod sa pag-ugmad og mga pantalan dinhi sa Sugbo basi sa Republic Act 7621 nga unang migahin og P10B nga gastohan sa Overseas Development Assistance (ODA) loan nga igarantiya sa nasodnong kagamhanan agad sa feasibility study sa Korean International Cooperation Agency (Koica) ug tua na ang mga papeles sa lamisa ni Presidente Rodrigo Duterte. Katingalahan kay ang CPA Manager Dennis Villamor maoy nagduso sa Mega Harbour ngadto sa Consolacion. Gikasagmuyo ni Mayor Teresa Alegado nga wala ilha sa CPA ang autonomy sa lungsod isip independent local government unit. Laing gumonhap mao ang giingong pakig-alayon sa Mega Harbour sa China Communications Construction Company para dredging nga gi-blacklist sa World Bank sukad sa 2011 nunot sa alegasyon sa kurapsyon ug pagpanglimbong. Hinoon sa kasabotan wala maghisgot sa maong dredging company kon dili iya ra sa Mega Harbour nga maoy nagtukod sa Manila Harbour ug pantalan sa Davao City. Hinoon sa dili pa sugdan ang maong proyekto ang kagamhanan sa Consolacion ug Mega Harbour nagkinahanglan og pagtugot o pagtangdo sa CPA, Philippine Reclamation Authority (PRA), NEDA ug DENR. Dakog posibilidad nga masango sa CPA. Proyekto nga makabenipisyo ang Consolacion sa ekonomikanhong aspeto sama sa business tax, real property tax ug job oppurtunities. Mokabat og 85 ektarya alang sa container port o pantalan ug 55 ektarya alang sa ubang industriya diin siyam ka ektarya itugyan o ihatag sa Consolacion. Usa sa industriya nga imontar ang Cebu International and Bulk Terminal Project nga nakuha ni Pres. Rodrigo Duterte sa iyang pag-adto sa China. Kauban sa maong mihuras ang North ug South Negros Biomass sulbad sa kakuwang sa koryente sa Negros Island. Kabahin kini sa 24 milyones dolyares gikan sa China diin ang ubang proyekto ibobo usab sa nagkalain-laing dapit sa nasod. Laing pasalig nga nakawos ug nasag-ob ni Duterte mao ang pasalig sa mga Chinese investors nga mobutang og pundo sa mga proyekto o programa alang sa Sugbo ug Visayas sama sa Light Rail Transit (LRT), socialized housing, waste-to-energy projects, uban pa. Samtang ang mga kongresista sa Sugbo nanghingusog nga gahinan sa nasodnong panudlanan og P170M alang sa Road Masterplan sa Sugbo. Ang LRT maoy prayoridad ni Pres. Duterte pagsulbad sa sulog sa trapiko sa Metro Manila, Metro Cebu ug Metro Davao. Dugang sa LRT nga makahingpit sa kasulbaran sa trapiko mao ang reclamation roads, coastal roads, MRT, BRT, taytayan, skyways, flyovers, tunnels, diversion roads ug mountain highways.
(csa_1156@yahoo.com/0905-250-4643)