MOABOT na sa 328 ka mga insidente sa extra judicial killings ang natala sa Commission on Human Rights (CHR) lukop Central Visayas, diin 37 na niini ang ilang padayong giimbestigar.
Matod ni Leo Villarino, chief investigator sa CHR 7, nga duha na ka mga kaso ang na-file sa Ombudsman batok sa mga pulis sukad nila gimugna ang Task Force EJK.
Mayo 22 ning tuiga dihang nagsugod ang pagtala sa maong ahensiya sa nagkadaiyang mga taho kabahin sa mga pagpamatay base sa usab sa operasyon sa kapulisan batok sa ilegal nga drugas ug kadtong giisip nga vigilante killings o kadtong wa mailhi ang nagpatay.
Ang CHR mao ang mopahigayon sa imbestigasyon base sa reklamo nga gipasaka sa ilang ahensiya ug ilaha mismo nga inisyatibo.
Hinuon, kutob lang sa rekomendasyon ang legal office sa CHR ug anaa ra gihapon sa hingtungdan ang pagpasaka og kaso sa korte.
Dugang ni Villarino nga kinahanglan mobarog ang matag usa sa katungod niini ug di mahadlok subay na usab sa katapusang adlaw sa Human Rights Consciousness Week karong adlawa.
Usa man gud sa hagit nga giatubang karon sa ilang ahensiya kining pag-back out sa mga saksi tungod kay mahadlok kini nga makig-coordinate nila.
Dugang ni Villarino nga unta motabang usab ang nakakita ug di kini mahadlok tungod kay maabot ra unya ang panahon nga sila na mabiktima, wala na unya’y mobarog aron motabang kanila.
Karong adlawa ang ika-68 ka tuig sa Universal Declaration of Human Rights.
Kagahapon, usa ka dialogue ang gihimo ni Villarino ug ang kauban niya sa CHR 7 sa Police Regional Office 7 ngadto sa mga hepe sa kapulisan sa Cebu, Mandaue, Lapu-Lapu, Naga ug Talisay aron mahatagan og lapad pa nga pagpasabot ang kapulisan sa EJK.
Lakip na usab ang konteksto sa human rights.
Dugang ni Villarino nga anaa sila karon sa proseso sa selection kabahin sa mga newspaper reports sa insidente nga ubos sa EJK.
Usa sa mga gisusi sa CHR sa nakalabay nga mga buwan mao ang pagpatay sa usa ka batan-ong lalake nga taga Brgy. Ermita, dakbayan sa Sugbo nga giingong kauban sa gikatahapang drug lord Rowen "Yawa" Secretaria.