DIGOS CITY - Gipangita sa ilang tagsa-tagsa ka pamilya ug sa Digos City Police Office (DCPO) ang duha ka mga menor de edad nga tinun-an human kalit lang nahanaw.
Unang gitahong wa makauli sa ilang balay ang usa ka Katrina, 16, Grade 10, ug molupyo sa Purok 4, Barangay Colorado ning dakbayan.
Matod ni Geasle, 39, inahan sa tinun-an, alas 7:00 sa buntag niadtong milabay nga adlaw sa dihang nananghid kini kaniya nga motungha na.
Nagsul-ob ang menor de edad og kolor puti nga t-shirt, jogging pants nga kolor blue, kolor gray nga sapatos ug nagbitbit og kolor violet nga bag.
Samtang alas 8:30 sa buntag niadtong Disyembre 5, miadto sa tunghaan si Mae, 13, Grade 9 ug molupyo sa Sitio Power, Barangay Tres de Mayo.
Gibutyag ni Marlito, 42, amahan sa menor, nga motungha na sa Digos City National High School ang iyang anak apan wa na mahiuli.
Uwahing nakit-an si Mae nga nagkuyog sa iyang klasmeyt nga molupyo sa M'lang, North Cotabato.
Parehong nahanaw ang duruha mao nga nabalaka na ang ilang mga pamilya hinungdan nga mitabang na ang mga sakop sa Women and Child Protection Desk aron nga makaplagan sila. (Orlando B. Dinoy)