COTABATO CITY - Di matukib ang gibating kahadlok sa pamilya sa usa ka negusyante human giitsahan og granada sa duha ka wala mailhing lalaki ang ilang balay.
Nahitabo ang insidente alas 2:15 sa hapon niadtong Huwebes didto Barangay Poblacion, Pikit, North Cotabato.
Apan maayo na lang kay way naangol o namatay sa maong hitabo.
Gibutyag ni Cotabato Provincial Police Office director Senior Superitendent Emmanuel Peralta nga ang balay nga giitsahan og granada gipanag-iyahan ni Jeremias Dandan.
Mga suspetsado daling misibat human sa hitabo sakay sa usa ka motorsiklo nga walay plaka, paingon sa hilit nga dapit sa Pikit.
Ang pagpanglabay og granada giatol sa kapistahan sa patron sa Immaculada Concepcion diin daghang mga tawo ang namista.
Dako sab ang pagtuo ni Pikit Mayor Sumulong Sultan nga posibleng personal nga atraso o grupo nga dunay kasuko ngadto kang Dandan maoy nagpaluyo sa pagpanglabay og granada.
Kapolisan sa Pikit Municipal Police Station padayon nga nag-imbestiga kalabutan sa hitabo aron mailhan ug madakpan ang mga suspetsado. (Edgar E. Fuerzas)