SECTIONS
Sunday, August 18, 2019

Garcia: Parusang Kamatayan (Death Penalty)

“NUNG mang ing mikasala mipatunayang masalese ing pikilalanan at masabal na,
ing senayang turu ning Pisamban e na pasubali ing pamanyalale king parusang kamatayan,
nung iti mu ing kabud malyaring paralan king matalab a pamamingwa
karing salang karing e matalarung mapanyikampu.

Nung, sakali man, ding e makamate paralan makagyu na la bang pakilaban
at ipamingwa ing kaligtasan da reng memalen karing masikampu,
ing makiupaya palugitanan na ing sarili na karing paralang deti,
uling deti migit lang mamayun karing matibe kabilyan
ning panglaganas a kayapan at lakwas makatuntun king dangalan ning taung lelangan.

Ngeni, kamatutwanan, anting bunga ring nung nanung malyari a ati king bangsa bang ayampat ing pamanyalungat-batas, kapamilatan ning pamanyampat king ninu man e makagawang panganib-e man bitasang darayu kaya ing pagasang ikabus na ing sarili na-karing sala nung nu ing pamamarusa king mikasala tatakan yang kaylangan “bina lang malagad, nung e la man e mimiral king kamatutwanan.”

— Katesismu ning Pisambang Katoliku,
Kadwang Pamituntun, 1997, US Catholic Conference

“E mu susuklyan ing marok king marok mu naman.
Mingat kang daptan ing mayap king mata ring balang metung.
Nung malyari, king sakdalan a makasalale kekayu, mye kayung payapa karing balang metung.
E kayu gaganti, kanakung kakaluguran, dapot mitagan kayung lulanan ning kamwa ning Dyos, uling misulat:”Kanaku ing pamangganti; papamayaranan ku la,”ngana ning Panginwan,
…E kayu paysaul king marok, dapot saulan yu ing marok king kayapan.”

— Rumanu, Dangka 12: Sunis 17-21
(Romans 12:17-21)

“E tamu sukat daraun ing bye ring aliwa bang itamu na’ing bumye.”

— Jagad Guru Siddhaswarupananda Paramahamsa

***

Malino ing pamanalakaran ning Pisambang Katoliku king pisasabyang mabayat ayni., dapot mamaksing na naman ing pisasabyan dikil king parusang kamatayan. Minuna neng mesibuk na ini kanita pang bayu ya pa man mebalangkas ing Bayung Dalerayang Batas Pambangsa o Constitution ning Pilipinas at dakal a sinalungat inya pin—agyang pepairal ne ning meging punbangsang Erap Estrada—mipatuknang ya.

Anting metung a Kristyanung bangsa at kamemetungan mu keti king Asya, dakal a sinalungat uling e pin makaayun king turu e mu ning Pisambang Katoliku nung e keraklan karing aliwa pang kasalpantayanang Kristyanu a manalig king pakalulu at pangamalunus agpang king turu ning Ginung Yesukristu.

Subali pa kanita, ala ne mang apalto ing batas ayti a apatuknang no ring panglipunang sala o ring darapat kareti uling dakal pa mu rin malilyaring makatakut at makalunus a sala ring melili’t mengadalumdum isip at memanyas pusung memalen laban karing para dang tau.

Balang metung kekatamu o agya mang keraklan mu, balu tamung deng sablang lelangan mangamate la ngan dapot ninu kekatamung mimisip a mate tamu naman? Antita mu naman ing katutwan ning sangkan o ba’t deng gagawang salang panlipunan makamate la, manako lang maragulan, makipangatawan lang pilitan at aliwa pang sala. Isip da reti deng aliwa marakap la’t miparusan dapot ila ali la.

Ing kapanwalan ning Kapisik, inya mu babalik da ing parusang kamatayan bang kanita malaya dang apatupad ing pamakamate karing dayukduk king bawal a panulu. Dapot, sana naman deng gagawa at pagmulan da reti ila pa mung samasnan dang dakpan at parusan at aliwa reng pakakalulu mu at alang laban a misasangkanan dapot alang malino patibe mikasala ilang utangan da bye.

Dakal kasing midarame ala namang kasalanan at mipatunayang deti mayap lang memalen o ala lang kamala-male.

***

Dake Talabaldugan:

Bawi karing katayang milaktawan:

1. bulan¹ – (palagyu) – mandam aslag at sislag kayalili na ning aldo neng bengi, mamampan king aldo anting lau, mipapampanan ning yatu mu naman king alino niti. English – moon. Alimbawa king pamangamit: “Maslag ya ing bulan, pigkeran kung dikut karin ya dinalan i Metsang malikut.”

2. bulan² – (palagyu) – apat a paruminggu at labing-adwa niti bang maging pabanwa. English – month. Alimbawa king pamangamit: “Maslag ya ing bulan, pigkeran kung dikut karin ya dinalan i Metsang malikut.”

3. bulanan – (panguri) – balang bulan. English – monthly. Alimbawa king pamangamit: “Bulanan ing pamamayad nang Iru keng inutang na kang Waning a patubwan.”

4. buldit – (palagyu) – dake ning katawang magagamit maralas king pamaglukluk. English – buttocks, butt, ass, bottom of the body. Alimbawa king pamangamit: “E baling mamarug ka king mikasalang anak dapot keng mu sanang buldit.”

5. buli – (palagyu) – kumpul, sapunggul, sampukaki. English – bunch or cluster of fruits, like bananas, lanzones, etc. Alimbawa king pamangamit: “Apat a uli ing seli nang saging Pasing bang pagtau na king kayaldwan ning bungsu nang anak.”
***
KASEBYANG KAPAMPANGAN: Malilyari kareng tau ing metung pasakitan ne o dirinan neng sangkan bang magdusa ya o magkasakit ya ing para nang tau at iti mipapasyag king kasebyan a makatuki—“mete ya lasa o pete mu ku lasa!” Buri nang sabyan niti pepakasakitan me ing sinabi kaniti o perusan meng asna kabinit pauli ning depatan mu kaya. Pasakit o parusa.

Alimbawa: 1. “Mete ya lasa keng kakapanaya i Yasmin keng tipan nang Miguel kayang e na tiparan inya pang kayanakan da inya metwa yang dalaga keng kakayasa.”

2.“Pete me lasa ing biserung damulag keng pamanyalake mu kaya inya uyta rugu mengapile-pile ya.”

***

Agkatan da kang mambag o midake nanu mang Kapampangan a kawatasan, sanese, sisti, kasuryan o nanu mang dikil king Kapampangan. Nanu mang kutang o sisti king misulat king Kapisik, malyaring ikutang o malinawan king talasulat. Pakiparala king email address, garciakragi@yahoo.com o iyaus o i-text king +639988948624 o +639423924399. Nung karapatdapat ya’t makayagpang king dalerayang tuntunang Kapisik, masa kang mirinang kapakibatan at milimbag ya sanu man kareng tutuking dangka ning Kapisik. Ipisik me, abe!
style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="1977900730">



style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="4158864647">


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph