KUMPIRMADONG dili na taptapan og tape ang mga buka sa pusil sa mga polis dinhi sa Northern Mindanao.
Kini ang mando ni Police Regional Office (PRO)-Northern Mindanao Regional Director Noel Constantino tungod kay bout niining mahimong responsable ang mga polis sa mga gidili kanila.
Matod sa tigpamaba sa PRO nga si Police Superintendent Surki Sereñas nga kung naandan kini kaniadto karon bout ni Constantino nga hunungon kini aron makita ug mahibaloan kung kinsa gayud ang mga polis nga disiplinado ug responsible sa ilang mga giisyung armas.
Dugang niini nga kon adunay muzzle taping daw nagpakita lamang kini og kawalay salig sa kapolisan.
Ang pagpangulo ni Philippine National Police Director General Ronald dela Rosa nagsalig sa kapolisan nga sila mahimong responsible isip polis nga dili basta magpabuto og armas labina kung wala sa duty.
Bahad ni Constantino sa mga kapolisan nga ang mosupak niini ug magpabuto sa ilang armas panahon sa pag-obserbar sa kapaskohan ug bag-ong tuig adunay kasupakan nga gikatakdang atubangon.