GIHAWOD ni Euniel Grant Capilitan ang 2016 Mayor Oscar S. Moreno Kiddies Under-12 Rapid Chess Tournament niadtong Sabado sa gabie, Disyembre 10, didto sa Inilog Grill Restaurant, Tiano-Kalambagohan St.
Naapsan ni Capilitan, tinudloan ni Leo Dinglasan, ang solong nag-una nga si Charles Gabing human sa ilang panag-agbat sa kataposang pito ka round aron mahuman og 6.5 puntos uban ni Kurt Managase.
Apan solong naangkon ni Capilitan, kinsa ang 2016 Shell National Youth Active Chess Championships 12-under grandfinals gikan Cagayan de Oro, ang titulo ug ang P5,000 nga cash prize human mikolekta og dakong tie-break points batok kang Managase.
Si Managase nahulog sa ikaduha nga pwesto ug nibitbit sa P4,000 nga cash prize.
Samtang, nagsunod sila Ruelle “Tawing” Canino, Gabing ug Jter Gumawan nga adunay unom ka puntos matag usa.
Apan human sa tie-break, niuli sila Canino, Gabing ug Gumawan sa ikatulo paingon sa ikalima nga pwesto sunod-sunod.
Niuli si Canino og P3,000 nga cash prize, samtang sila Gabing ug Gumawan niuli sa P2,000 ug P1,000 nga cash prize, sunod-sunod.
Aron makompleto ang top-10 money circle, niuli sila Rhea Jean Canino, Aaron Dacut, Michael Aleria, Joseph Dela Rama ug Paul Andrew Romanda og tag-P500 nga cash prize matag usa.