MAKAPATINGKAG sa dawunggan kining pasidungog sa US magazine nga Foreign Policy ngadto ni Senador Leila de Lima isip usa sa 100 ka mga global thinkers sa tuig 2016.
Matod pa nga tungod kuno kini sa lig-ong adbokasiya ni de Lima sa pagtamod sa rule of law ug ang iyang maisugon nga pagpa-imbestigar sa giingong extrajudicial killings sa nasod.
Ang kanhi pangulo sa Commission on Human Rights ug kanhi usab justice secretary nalakip sa 13 ka mga gipasidunggan ubos sa “Challengers” category. Dili kuwestiyon ang kaisog ni de Lima kon extrajudicial killings ang hisgutan tungod kay bisan pa gani og ang presidente sa nasod nga si Rodrigo Duterte ang iyang gikabangi wa man matandog ang iyang baruganan.
Pero ang pangutana mao ang tayming sa paghatag nila og award ni de Lima kinsa padayong gihasol sa kontrobersiya nga naglambigit sa gidiling drugas ug ang mga kaso nga giatubang niini.
Wa pa man tuod mapamatud-i nga siya sad-an, apan dili ba nga ang pasidungog ipahaom man ngadto sa usa ka tawo nga walay mantsa sa katilingban?
Angay sab siguro susihon o ikonsiderar sa Foreign Policy magazine ang pikas panid sa kinabuhi ni de Lima sama sa iyang pag-angkon nga siya nakig-relasyon sa iyang driver nga usa ka minyo.
Dili lang kay salikwaot paminawon alang sa nasod ang maong pasidungog kon dili mahimong kiwang usab kini alang sa mga inila ug respetado nga mga tawo nga sila si kanhi US State Department Hillary Clinton, German Chancellor Angela Merkel, Canada Prime Minister Justin Trudeau, ug UN Secretary General Ban Ki-Moon nga sama kang de Lima gipasidunggan usab sa maong magazine.