GIINGONG gikatakdang hulipan si Police Chief Superintendent Noel Constantino sa Regional Director sa Police Regional Office (PRO)-Northern Mindanao karong umaabot petsa 20 ning bulan sa Disyembre.
Kini ang gibutyag ni PRO spokesman Surki Sereñas ug miingon nga dili pa gayud kini kumpirmado hangtod dili gayud moabot ang implementation plan nga opisyal gayud kining hulipan labina adunay mga ora-orada nga mga kabag-ohan nga gakahitabo.
Dugang ni Sereñas nga bisan siya wala nasayod sa lawom nga rason sa gikareport nga paghulip niini tungod kay sayod siya kung unsa ka aktibo sa iyang trabaho si Constantino.
Gani sa pamunoan niini nag-numero uno ang Northern Mindanao sa pakigbatok sa ginadili nga droga, nag-una sab nga rehiyon nga maoy miimplementar og camp based rehab ug ingon man pagpakigbatok sa ginadili nga swertres sa rehiyon.
“Ubay-ubay sab iyang mga accomplishment sa atong rehiyon ug aktibo siya sa iyang trabaho,” matud ni Sereñas.
Dugang niini nga dili pa niya manganlan ang hulip ni Constantino apan sa iyang pagkasayod ibalhin kini ngadto sa kaulohan diin dako na usab ang posisyon niini.
Giklaro usab ni Sereñas nga malipayon si Constantino sa iyang pagbalhin tungod kay susama sa usa kini ka promotion ug normal lang usab kini sa kapolisan nga ibalhin sa laing mga lugar.
Wala na usab mikomento si Sereñas sa report nga posibleng aduna kini natumban tungod sa iyang maayong performance ning rehiyon. (SVB)