SA iyang kalibre, kasamtangang gamay ra ang suweldo ni Stephen Curry.
Apan inig human sa iyang kontrata ug makadesisyon siyang magpabilin sa Golden State Warriors, si Curry mao na unya ang labing dako og suweldo sa kasaysayan sa National Basketball Association (NBA).
Sa bag-ong collective bargaining agreement, ang two-time MVP maoy makabenepisyo og maayo ug gibanabanang moabot sa $207 million sulod sa lima ka mga tuig ang naghuwat nga kontrata kaniya.
Si Curry, kinsa naa sa katapusang tuig sa iyang $44 million contract extension nga iyang gipirmahan, aduna ra’y $12 million nga suweldo karon nga season.
Apan sa sunod nga season, gilaumang moburot sa $36 million ang dawatong suweldo ni Curry sa usa lang ka tuig. Mosaka pa kini sa $47 million sa katapusang tuig sa umaabot niyang bag-ong kontrata.
Napamatud-an ni Curry ang iyang kapabilidad dihang iyang naagak ang Warriors sa duha ka sunosunod nga final appearances diin nakabira sila og usa ka titulo. AP/ESL