USA ka igsuon sa aktibong pulis ang nasikop human namaligya og shabu sa nagtakuban nga pulis atol sa buy-bust operation sa presinto uno alas 8 kagahapon sa buntag didto sa Barangay 21-C, Poblacion District, siyudad sa Davao.
Ang suspek pag-umangkon sab sa retiradong kanhi hepe sa Sta. Ana Police Station.
Si Chief Inspector Hamlet Lerios, hepe sa Sta. Ana Police Station, nag-ila sa suspek nga si Talib Barah Ainin, 29, nagpuyo sa Block 71, Barangay 21-C.
Giingon ni Lerios nga nakadawat sila og impormasyon labot sa pagpamaligya og gidiling druga sa suspek, hinungdan nga ila kining gipailawom sa test buy.
"After sa ating test buy, nag-positive tayo, kaya nadakip natin ang suspek, who is nephew of former COP here [Sta. Ana PNP] PCI Hadjirul Ainin, and a brother of an active police assigned at Sasa Police Station," butyag ni Lerios sa SunStar Davao SuperBalita.
Nakuha sa posisyon sa suspek ang tulo ka pakite sa gituohang shabu ug mga drug paraphernalia.
Una nadakpan si Ainin, natigayon sab ang usa ka buy-bust operation alas 4 sa kaadlawon, Lunes, didto sa Room F sa Twin H Inn sa Barangay Matina Aplaya ning siyudad.
Nasikop ang magsuon nga suspek nga sila Habeb Conception Bulang, 30; ug Hajan Conception Bulang, 24, pulos taga Zonta Village, Barangay Tibungco ning siyudad.
Upat ka mga pakite sa gituohang shabu ang nakuha gikan sa mga dinakpan kini giingong mga newly-identified drug personalities.
Kasong paglapas sa Republic Act 9165 kon Comprehensive Dangerous Drugs Act of 2002 ang kasong ipasaka sa mga suspek didto sa korte.