Kapulisan: I-video ang magpabuto'g pusil sa Pasko

DAKO ang pagsalig sa Police Regional Office (PRO)-Davao Region nga di magpabuto ang mga pulis sa ilang mga armas, apan gihangyo ang publiko nga i-video ang pulis, sundalo, ug sibilyan nga magpabuto sa ilang pusil karong Pasko.

Kini ang gibutyag ni PRO regional director Manuel Gaerlan human nagmando ang headquarters sa Philippine National Police nga walay ipahigayong mga muzzle tapping kun pagtaptap sa buka sa mga armas karong Yuletide season.

Sumala ni Gaerlan nga nagpakatag na siya og impormasyon sa tanang opisyal sa rehiyon nga pahugtan ang pagbantay sa palibot ugaling dunay magpabuto og pusil, ma-sibilyan man kini o ilang mga kabarong pulis.

“I have given instructions to my commanders, and to chief of police for them to intensify the campaign lalo na yung illegal discharge of firearms,” sulti ni Gaerlan sa mga tigbalita Miyerkules sa buntag, Disyembre 21.

Giingon sa opisyal nga dako ang iyang pagsalig sa iyang mga kaubanang pulis kinsa nagatamod sa balaod ug dili mosupak sa mga regulasyon nga gipatuman.

“Wa na tayong muzzle tapping dahil una-una sa ating kapulisan, we trust them, and I presumed the regularity in the performance of duty,” sumpay sa opisyal.

Giawhag sab ni Gaerlan ang katawhan nga mokuha og video ug hulagway sa mga sibilyan ug kung dunay pulis nga magpabuto og pusil karong Pasko ug sa pagsugat sa Bag-ong Tuig.

“Sa ating mamamayan, kahit sino, ini-encourage ko kayo, lahat tayo may cellphone, i-video n'yo kahit sino man, kahit pulis, military or civilian na magpapaputok, and we will take any necessary actions,” awhag ni Gaerlan.

Bahad sa kapulisan nga wala silay pilion sa pagpatuman sa balaod diin bisan kung lisensiyado ang ilang armas, ikansela ang ilang mga lisensya, ug kung dili lisensiyado ug makuha ang gipuy-an sa nagpabuto, ilang ipahigayon ang pag-ronda sa dapit aron makasuhan sila didto sa korte.