GILUNGKAB atol sa Pasko ang usa ka pawnshop nga nahimutang sa downtown area sa dakbayan sa Sugbo sa gituohang mga sakop sa Acetylene gang apan mga suspek wala maka abli sa vault diin didto gibutang ang mga alahas.
Nakurat nalang ang mga kawani sa Cebu Gold Pacific Pawnshop nga naa nahimutang sa dalan Osmeña Boulevard ning syudad sa Sugbo human naabli na ang atop sa ilang buhatan ug suway nang giablihan ang ilang vault nga naa didto ang ilang mga alahas.
Sa ubos sa vault nahabilin ang mga gamit sa pagpanglungkab sama sa acetylene nga mao untay iabli apan giingong nahutdan kini sa sulod sa acetylene nga maoy hinungdan nga ang kwarta nalang niini maoy gipang kuha.
Moabot ngadto sa P271,488.95 nga salaping cash ang nakuha sa mga wala pa mailhing kawatan nga ilang kita niadtong miaging semana.
Daling mitawag og puli ang gwardya sa pawnshop aron masusi kung unsay nakuhang butang sa sulod sa pawnshop.
Matod ni Benjamin Fernandez gwardya sa maong pawnshop nga ilang gituohan nga niadtong 24 sa gabii hangtod ganinang tungang gabii gilungkab ang ilang buhatan sanglit tunga sa adlaw ra sila nga nagtrabaho niadtong bispiras sa Pasko.
Duna hinuoy CCTV camera ang pawnshop nga maoy subayon karon sa kapulisan aron mailhan kinsa ang maong mga responsabli.
“Pag-abot namo karong buntag nabuslot naman ang bungbong ug ang atop unya naa pa sa sawog ang ilang acetylene nga nahurot na siguro ba kay wala man gyud sila ka abli,” matod ni Fernandez.
Gituohan nga ang mga suspek didto miagi sa pikas building ug mibuslot sa atop ug malampuson nga nakasulod sa pawnshop.
Daling gipatawag ang gwardya nga si Rene Doblados nga maoy nag duty sukad pa niadtong Disyembre 24 hangtod kagahapon apan nagduda ang kapulisan tungod sa mga pamahayag niini nga sud gawas.
Gihimakak ni Doblados nga nakakita siya sa mga tawo nga didto misaka sa building nga iyang gibantayan.
“Kung diri pana moagi naa unta nay force entry sa gate wala man, hasta diha wala man, wala pud ko kakita nga niagi na sila diri,” pasabot ni Doblados.
Apan ipaubos siya sa imbestigasyon tungod sa mga pamahayag niini nga nag sulod gawas.
Usa sa gikatingad-an sa imbestigador diin sa unang pangutana niini dili siya ang duty niadtong Disyembre 24 hangtod sa Pasko apan nasuta nga wala pa siya hulipi sukad siya mi duty niadtong bispiras sa pasko.
Wala usab nila isalikway ang pagduda nga dunay nahitabong pagkonsabo sa gwardya ug sa mga suspek.