SUBLING nagpahimangno ang tinugyanan sa Department of Health (DOH) ug Bureau of Fire Protection (BFP)-Northern Mindanao sa Pasko ug bisan unsa nga okasiyon ilabi na karong kasaulogan sa bag-ong tuig nga likayan ang mga pabuto ug kinahanglang mag-amping ug magbinantayon panahon sa maong kasaulogan.
Gi-discourage sa tinugyanan sa DOH ug BFP ang paggamit sa mga pabuto atol sa kasaulogan aron nga malikay gayud sa mga katalagman ilabi na kung mawad-an og tudlo o mabuthan atol sa kasulogan sa bag-ong tuig.
Gibutyag ni Nur Aian Caridad kinsa health education and promotion officer 3 sa DOH-Northern Mindanao nga malipayon gihapon kini gumikan kay wala’y nabuthan dinhi mismo sa dakbayan sa Cagayan de Oro ug dako ang pagkunhod gikan sa 64 niadtong milabay nga tuig 2015 ngadto na sa upat na lamang ka mga biktima.
“Naa ta’y upat ka natala nga firecracker related incidents,tulo ni siya sa Iligan City ug isa sa Ozamis City, last year number 1 atong Misamis Oriental pero karon ah… murag Iligan ra man ni tulo ka buok dayon Ozamis isa,malipayon gihapon ta from 64 as of today naa ra ta’y upat nga natala sa atong pag survey sa atong surveillance sa atong data nga nakuha sa atong operation center sa Department of Health” pahayag ni Caridad sa interbyu sa usa sa mga sibyaan sa radyo.
Nanawagan ang ilang buhatan,“Sa maka-usa pa gi-aghat nako ang mga isig kapamilya or parents nga dili gihapon ta mag gamit og pabuto labi na sa pag-saulog sa atong New Year, pagtagbo sa atong New Year kay para zero injury lang gihapon ang atong miyembro sa atong pamilya ug kumpleto ang atong mga kamot ug dili ta masamdan kung magamit man gale ta og pabuto ug mag-amping amping ta sa dili lang sa pabuto, sa atong health pud” dugang pahayag niini.
Nasayran nga niadtong tuig 2014, adunay 87 natalang firecracker incidents ug mikunhod sa tuig 2015 diin adunay natalang 64 na lamang ka mga biktima gikan sa bulan sa Disyembre petsa 21 hangtod na Enero 5 ,2016. Samtang sa pagkakaron, adunay natalang upat ka mga biktima ug nanghinaot nga dili na kini madugangan pa.
Giingong tungod sa pahimangno na usab sa ilang buhatan, dako ang gikatabang nga mikunhod ang ihap sa biktima diin namatikdan niadtong kasaulogan sa Pasko sagad gigamit sa katawhan nga girekomendar usab sa DOH mao ang fireworks ug mga torotot.
Samtang nagpahimangno usab ang tinugyanan sa BFP-Northern Mindanao ilabi na ni Senior Superintendent Domingo Tambalo, Northern Mindanao Director, nga “Sana po, nakikiusap kami, kumakatok kami sa mga puso niyo na iwasan natin yung paputok, kinakailangang magsama-sama tayo para araw-araw maging Fire Prevention Day at ang karamihang pong sunog talaga ay sa kuryente at saka ung LPG pangatlo yung kapabayaan natin” pahayag ni Tambalo sa interbyu sa radyo.
“Sana mga kababayan natin dito sa Northern Mindanao ang kapabayaan ay sanhi nang sunog huwag hayaang maabo ang pangarap natin sa 2017” dugang pahayag niini.
Nanghinaot ang tinugyanan sa DOH ug BFP nga sa panahon sa kasaulogan sa bag-ong tuig nga unta wala na’y mabiktima o mabuthan pa sa mga pabuto.
Namatikdan sab niadtong adlaw sa pasko nga sagad sa katawhan migamit og fireworks ug torotot nga maoy usa sa girekomendar sa DOH.