ADIOS 2016, gracias 2017. Ngem guray, pards…saan ngata a grasa wenno disgracias ti pagteng ni 2017? No apay….gapu met laeng kadagiti eksena-2016. Saan a mailibak iti sangalubongan (saan laeng a ditoy Pilipinas) dagiti agsisipol a kontrobersiya a napasamak iti kallabes a tawen. Ti kaudian ket ti isyu a nangpabusi manen iti ngangaw ni Pres. Digong. Daytoy ket gapu iti naipadamag nga isardengen ti US ti tulongda ditoy pagilian. Pataptappuakennan dagiti puwersa-militar ti Amerika nangruna idiay Mindanao. Tsk tsk…! Kunak man la no awanen parikut ta ngamin ket agkapapelanda kenni US President Trump? Medyo kano agkasingin ti ugali ken dilada. Ngem apay a napudot latta ti ulo ni Digong kadagita a puraw? Hmmm…saan ngata nga immataki ti migraine-na isu a pimmalapal manen daytoy iti di malamot ti baboy a basnot? Ditay laeng ammo…ngem napasamak manen ti namnamaentayo nga eksena. Adda ngarud pay nagkuna a no koma mabalin ta no ma-haybladen ni Digong ket adda mangyawat kenkuana iti ice-cream. He he…joke lang , pero…baka sika ti matokhang a dina oras, pards. Umasok to ketdi nga umapoy ti ngangawna. Basol ti ice cream.

********

Sakbay ti entrada ti 2017, inaprubaranen ni Pres. Duterte ti nasurok tallo trilyon a budget para ita a tawen. Gapu iti makaanay a pondo para iti edukasyon….libren ti panagadal kadagiti Government State Universities and Colleges. Kayatna a sawen…patas a gundaway daytoyen kadagiti agpaadal nangruna kadagiti nakurapay. Saan laengen a dagiti baknang wenno addaan ti makastrek kadagita a pagadalan. Kudos kadagiti opisyales nga adda iti likud daytoy a programa. Sapay koma ta maipatungpal daytoy a siannayas dinto magameran iti baro manen a kontrobersiya. Adda laeng arasaas: sapay koma ta maikkat metten a baklayen dagiti marigrigat nga estudyante dagiti adu a misilanyos tangay libre metten ti matrikula. Manarimaanen a maad-adal daytoy babaen kenni Sen. Legarda idiay senado. Matagiuray ti resulta.

********

Iti pay laeng 2017 national budget….nailatangan met ti Departamento ti Salun-at iti pondo tapno malibre dagiti nakuparay iti agas ken pannakaospital. Napintas a gannuat. Adu ngamin kadagiti nakurapay ti madisdismaya iti serbisyo dagiti pagagasan ti gobyerno. Arig dida kabaelan ti ngina ti agas ken adu pay a serbisyo medical. Ngem babaen iti baro a programa, malaksid iti it-itden ti Philhealth….nangilatangen ti administrasyon Duterte iti umdas ken libre a serbisyo-medikal kadagiti marigrigat. Kudos manen kadagiti tattao a nakapanunot. Maysa a paset ti programa ket ti pannakailatang ti umdas nga agas kadagiti ospital mismo tapno saanen a gumatang pay dagiti pasyente kadagiti parmasya iti ruar. Imbag laketdin ta napanunotda daytoy a gannuat. No idi pay koma a naipatungpal….adu koma ti nasalbar a biag. Kudos apo Digong.

********

Sipud nagtugaw ni Pres. Duterte…naipuon metten dita ti kampanyana kontra illegal a droga. Saanen a mailinged iti kaadduan ken uray iti sangalubongan ti nagnaan ti programa. Pudno a rinibun dagiti natay babaen kadadgiti lehitimo nga operasyon ti Kapulisan ken dagiti kunkunada a vigilante wenno tattao a naggundaway. Gasut a ribun dagiti simmuko. Adu kadakuadan ti adda kadagiti nailatang a rehab-centers iti sapasap a pagilian nupay agkurkurang pay laeng dagiti pasilidad para kadagitoy. Suma-total: nagna ti ngipen ti linteg kontra illegal a droga. Adun dagiti naaresto kadagiti narpuog a pagaramidan ken umok ti illegal a droga. Kunada ngarud…kasla saan a nakappapati nga adu gayam nga opisyal ti gobyerno ti karaman iti illegal a negosyo ti droga ditoy pagilian. Naibutaktak laeng dagitoy babaen iti panagtakem ni Pres. Duterte iti likud dagiti pammabalaw ken basnotda kenkuana. Dagita nga eksena ti nangpatalinaed iti nangato a kartada ti ratings ni Digong kadagiti surveys nga immabot pay iti excellent. Dayta ti punpuntiryaen ita dagiti kontra-Digong teams. Kayatda a dadaelen ti naganna. Adda pay mangar-aramaten a kas armasda ti isyu panggep iti salun-at ti president…malaksid iti extra judicial killings. Iti panakitami….dinto agsardeng dagita a panggep kontra kenkuana agingga iti situtugaw ni Digong kas presidente.

********

Itay kallabes a tawen, saan laeng a dagiti nabunga a misyon ni Digong iti nagduduma a taripnong sadiay ballasiw-taaw ti nangmarka iti 2016. Rinugyannan a kinarintar ti sapatana idi eleksiyon kontra iti kriminaledad ken korapsiyon. Nupay intuloyna ti makiinnuman kadagiti taga-CPP-NDF-NPA, MILF ken MNLF para iti panagkaykaysa ken pannakaresolbar iti riri ken di pagkikinnaawatan….nabatad ti takderna kontra kadagiti terorista kas koma ti Abu Sayaf, Maute Group ken dadduma a kaarngida. Saanna met a pinalabas ken kinaluban ti aramid (a kakurakutan) dagiti impatugaw ken nagtalkanna a tao kas koma kadagiti komisyoner ti BI wenno Bureau of Immigration. Nupay nakadidillaw kano ti nangato a talek ti presidente iti PNP ken AFP….adu dagiti agkarkararag a sapay koma ta ita a tawen ket maimatanganto ti umili a dinto kaluban ni Digong ti aramid a maikaniwas dagiti kameng ti otoridad. Tay kano adda met madusa ta nakaaramid iti krimen. Amen!

********

Saludsod: ita a baro a tawen….adda ngata mapabaro met iti takder ni Pres. Duterte panggep iti pannakigayyemna iti China? Dinto ngata madehado ti Pilipinas panggep iti isyu ti West Phil. Sea? Pudno ngata ti takder nga agsosyo laengen ti Pilipinas ken China iti Oil exploration kadagita nga isla? Pudno ngata ti diaya a tulong nga armas ti China para iti AFP ken PNP tapno mapapigsa ti kampanya ti Pilipinas kontra illegal a droga ken terorismo? Ngem aguray, pards…saan ngata a kasla silang ti diaya a tulong? Kuna ngamin dagiti analysts: no awatentayo ti diaya ti China a tulong (armas)…saan ngata a naigaluttayon iti bukodtayo a tali? Saantayton a makagunay wenno makareklamo no aniaman ti plano ti China nga aramiden iti West Phil. Sea ta siutangtayon kadakuada? Kuna met dagiti sutil: amangan ta ap-appanandatayo laeng tapno apaman a kimmagattayo…nabanniitandan ti pagilian. Aggulagultayto man, nalpastayon a nasimaan. In short…amangan kano ta maysa dayta a palab-og. Ngem no iti panagkita ken panangarisit ti Duterte Administration ket pagimbagan ti pagilian dagita a diaya a tulong ti China…saan met ngata a nakadadanag. Dayta koma adda met pagtengngelantayo tapno saantayto a matrato a kas adipen wenno tagabo.

******

Ita tawen, 2017…adu a Karit ti kayattayo nga imaldit: sapay koma ta agtultuloy latta ti anglem ti kampanya kontra illegal a droga; adda koman madusa kadagiti nangangato a turayen ti pagilian a nairaman iti illegal a negosyo nangruna idiay NBP; adda koma metten ti hustisya kadagiti biktima ti Maguindanao masaker ken isyu ti SAF-44; malawlawagan dagiti panaglabsing iti human rights ken adu pay a reklamo iti kallabes a tawen; ken dinto koma bumaaw ti karit panggep iti kriminaledad ken korapsiyon. Ngem kangrunaan a karit dagiti umili ket: sapay koma ta ikkaten ni Pres. Duterte ti agpangta ken agbassawang tapno di umadu dagiti masaktan ken mapengdan koma dagiti atras-abante a pangeddeng. Sapay koma ta adda pagnaanna dagita a KARIT-2017. Iti pakabuklan ti Karit ken Kayetket ken Sun Star Baguio….happy new year! Adios mi amor, ciao, mabalos!