ANG Davao City All Stars modepensa sa ilang titulo batok Cagayan de Oro (CDO)-Misamis Oriental tandem sa rematch sa CDO-Misamis Oriental versus Davao All Stars Chess Tournament sa Enero 7 didto sa Tablon Gymnasium, CDO.
Matud ni National Chess Federation of the Philippines (NCFP) Regional Director James Infiesto sa Facebook chat sa SunStar Davao nga niadtong 2015, gipildi nila ang CDO-Misamis Oriental og duha ka puntos sa team event.
“They are heavily favored because of their higher average rating.”
Gilauman ni Infiesto nga bug-at ang kompetisyon karong tuiga diin ang mga kalaban mas gipalambo ang ilang line-up diin dunay tulo ka titled magduduwa sa ilang team.
“But we will do our best to defend our crown,” asoy sa NCFP regional director.
Gawas kang Infiesto, moduwa sab sila si Davao All Stars dulaan nila National Master (NM) Alex Lupian, NM Cedric Magno, Jason Salubre, Henry Lopez, Harrison Maamo, Lyndon Sombilon, Reynaldo Quiñonez, Jimmy Dano, Rhynan Arce uban ni Engr. Allan Diez ug Darwin Bermudez isip mga team captains.
Samtang sa CDO-Misamis Oriental, gilangkuban nila NM Rustum Tolentino, NM Levi Mercado, Lennon Hart Salgados, Jhonnel Balquin, Nazario Ubanan, Antonio Chaves Jr., Basilio Pandan Jr., Bryan Jose, Randolph Dalauta, Ismar Irenick Roa Estrella ug Domingo Oga.
Ang kompetisyon gi-organisa ni Father Vic Arellano aron mas mapromotar pa ang chess alang sa kalinaw.
Premyong salapi sa kantidad og P24,000 magpaabot sa mananaug kon diin giisponsoran sa Barangay Tablon, CDO sa koordinasyon sa Explore Misor ug Mindanao Chess.