MALIPAYONG Bag-ong Tuig kaninyong tanan! Sama sa kidlat nga nikilab ang mabulukon ug di malimtan nga tuig 2016.
Di kini nato malimtan tungod kay taga-Davao ang nahimong ika-16 nga presidente sa bugnong lugaynon niadtong Mayo 2016.
Di sab kini makalimtan tungod sa dul-an usa ka milyon nga mga durugista, mga users ug pushers ang nisurender sa kapulisan nga wala nahitabo sa kasaysayan sa Pilipinas.
Daghan sab ang nabugha ug nadakpan nga tigpayuhot sa droga apil na niini ang pagsaknit sa mokabat og P2 bilyon nga shabu sa kaulohan niadtong Disyembre.
Kini na daw ang pinakadako nga nasungkit sa “war on drugs” sa bag-ong gobyerno ni Presidente Rodrigo Duterte.
Di pa daw kini niya lung-an kay baga kaayo ang libro sa listahan sa mga nahiapil sa drug trade sa nasud, gikan sa mga naglibot-suroy sa dalan hangtud sa mga opisyal sa gobyerno.
Ingon pa ni Duterte sa iyang pakigpulong sa media una nagbag-ong tuig nga wala siya nasayud nga ingon niini ka lala ang problema sa druga sa Pilipinas mao nga naghatag kini'g lugway nga iyang sulbaron sud sa unom ka bulan.
Karon molapas pa sa unom ka tuig sa iyang termino nga hingpit kining masulbad.
Malipay na daw siya nga bisan sa kagamay sa panahon, may naambag siya sa pagprotekta sa atong nasud ug sa umaabot nga kaliwatan gikan sa mga tigpahimulos sa gahum.
Ug tuod man, luyo sa makalilisang nga resulta sa iyang “war on drugs” diin libuan ang namatay tungod kay nisukol sa kapulisan o gipangpatay sa mga death squad nga wa mahibal-i kung sa gobyerno ba o sa mga karibal niini nga gangs, daghan gihapon ang nituo ug nisalig kaniya.
Bisan dinhi sa Davao uyon ang mayoriya sa katawhan kang Duterte sa iyang kampanya batok sa gidili nga droga ug kurapsyon.
Nagdala kini'g bag-ong paglaum sa katawhan nga moundang na ang kriminalidad dala sa droga ug kurapsyon.
Mas mituo ang Dabawenyo kay kung di ko masayop dul-an sa P100 bilyon ang infrastructure projects nga ipundar dinhi sa Davao sa sunod tulo ka tuig.
Apil na niini ang mega harbour sa 200 ka ektarya nga reclamation area sa may Agdao District ug Magsaysay Park.
Pagasugdan sab ang coastal road nga hastang dugaya na nga giplano apan mora'g eroplano nga nagsige la'g lupad ug wala motugpa.
Naa say proyekto sa pagpalapad sa suba sa Davao ug Talomo nga himuong tourist spot.
Naa sab ang “crossover” road gikan sa Barangay Lasang padulong sa Toril ug ang monorail system sa downtown area sa siyudad.
Mobaha sab ang proyekto sa serbisyong sosyal gikan sa Department of Social Welfare and Development, mga proyektong agraryo ug patubig gikan sa Department of Agriculture, National Irrigation Administration ug daghan pa.
Madayon na kaha nga mahimong Metropolitan ang Davao sama sa Metro Manila ug Metro Cebu nga may lima ka chartered cities?
Gawas sa Davao City, basin mahimo nang hingpit nga siyudad ang Toril, Buhangin, Sasa ug Calinan.
May purohan na ang nagdamgo nga mahimong mayor karon kay daghan nang kapilian ugma damlag.
Dili kini imposible ilabi na nga anaa sa atong kamot ang atong kapalaran sa 2017.