MABINI, Comval Province - Patay na dihang nabangalan ang usa ka lalaki didto sa Purok 1-A, Sityo Bay-Bay, Barangay Pindasan, alas 5 sa buntag, Sabado, Disyembre 31.

Ang namatay giila nga mao si Merlito Corpuz, 64, minyo, nagpuyo sa Purok 1-A, Bay-bay, Barangay Pindasan, Mabini.

Segun sa taho sa kapulisan, nakadawat og tawag gikan sa nagpakabanang lungsoranon ang Text Hotline sa Mabini Municipal Police Station nga nagpahibalo kalabot sa patay'ng lawas nga napalgan didto sa sapa.

Daling miresponde ang mga sakop sa Mabini Municipal Police Station ug naglusad og imbestigasyon sa lugar.

Miguwa sa imbestigasyon nga ang biktima nakig-inom sa iyang mga higala niadtong Biyernes sa gabii.

Apan alas 7 sa gabii, mibiya ang biktima aron mopauli apan namatikdan sa mga higala nga hubog na ang biktima.

Wala na makauli sa ilang bala ang biktima hinungdan nga gipangita sa iyang pamilya.

Alas 5:30 sa buntag, nakurat ang kabanay sa biktima human nabangalan ang biktima didto sa sapa.

Nagtuo ang kapulisan nga nalumos ang biktima human naubog sa tubig.

Nanaghap sab ang mga imbestigador nga posibleng nahulog sa tulay nga kahoy ang biktima samtang naglakaw pauli sa ilang balay tungod sa kahubog niini.

Patay'ng lawas sa biktima gihaya sa usa ka punerarya sa Barangay Del Pilar, Mabini.