“BACK to daily grind.”

As in balik na sad ta sa inadlaw-adlaw nga kalbaryo sa grabeng traffic, inilogay sa sakyanan, baha, ug uban pang mga kontrabidang butang nga makaguba sa atong adlaw.

Kumusta ang bag-ong tuig? Ang tuig ra’y bag-o pero ang kinaiya ug ang mga nagkadaiyang suliran sa atong palibot, siguradong padayon gihapon ning maghatag og labad sa atong ulo.

Sige na lang, atong hunahunaon nga suwerte pa gihapon ta nga naka-survive ta sa 2016. Ang uban wa na abti og 2017. Kitang mga nia pa, the show must go on.

Bag-ong tuig, bag-ong hagit.

       

Una-una lang

Magpasalamat ta sa laing higayon nga gihatag sa kahitas-an ug nakaabot ta aning pangidarona sa kinabuhi. Mao nay pinakanindot nga regalo sa tanan nga dili kabayran og sapi.

Matod pa lagi sa among language consultant nga si Sir Lam (Lamberto Ceballos) nga, “ingon ana gyud na, una-una lang.”

Amo ning nahisgutan tungod sa pagtaliwan niadtong December sa banggiitang manunulat, magbabalak, pianista ug kompositor nga si Mel Baclay sa edad nga 64.

Gisuwat na ni sa atong kaubang maglilindog nga si Ernesto Lariosa ug diha ra pud ko nasayud sa maong masulob-ong balita.

 

Mel Baclay

Si Mel Baclay una nakong nahimamat atol sa kasikatan sa Cebu Pop Music Festival (7th Cebu Pop) niadtong 1988 dihang nidaug ang iyang komposisyon nga “Bituon sa Pangandoy” nga gi-interpret ni Girlie Lapinid. Samtang ako usab ang 2nd prize ug best interpreter sa akong gisuwat nga “Pasalamat.”

Pagkasunod tuig, si Mel nihimo og kantang “Agila” ug nagpatabang siya og pangita og quartet nga singer aron maoy mokanta. Ako siyang gihatagan sa numero ni Gani Villarojo. Iya usab nakit-an si Elvis Somosot. Ug didto iyang gibunyagan ang maong grupo og “Sakdap.”

Grand slam siya sa contest sa balak sa Sun.Star apan human sa ikatulo katuig niyang kadaugan, wala nako kadungog nga niapil pa siya og bisan unsang contest.

 

MMFF hinay jud

Niadtong Pasko, mas puno pa ang pelikulang Super Parental Guardians ni Vice Ganda sa mga sinehan kumparar sa mga entry sa Metro Manila Film Festival.

Matod pa sa mga tiketera nga akong nahinabi nga kon buot kunong hunahunaon ikaupat na to ka semana sa Parental Guardians sa mga sinehan.

Mao nay sayop sa executive committee sa MMFF kay wa gyud silay pambata nga pelikula. Puwerte pang mahala P225 ang pulta nga mga low-budgeted films ra man unta na.

Mao tingali niingon ang MMFF nga nalipay sila sa gross sales kay gamay ra man sila og puhunan kay indie films gud, unya gipapultahan og pang-box office hit sa Hollywood ang presyo. Maayo kaha?