TALIWALA sa nagkagidlay nilang kampanya sa National Basketball Association (NBA) miaging tuig, ang Miami Heat nagpagawas og undanon nga desisyon – ang pagseguro nga magpabilin kanila ang ilang champion coach.
Si Fil-Am coach Erik Spoelstra mipirma na og contract extension sa bugtong team nga iyang natrabahuan.
Basi sa taho sa Sun-Sentinel.com, ang Heat wala nagpagawas og opisyal nga pamahayag kabahin ning maong kalambuan.
Apan mialisngaw kini human nagpagawas og mensahe si Spoelstra aron ipadayag ang iyang pagpasalamat sa team management.
Apan wala’y migawas nga detalye kabahin sa kasabutan.
“I just feel very grateful that I have an opportunity with a team like this,” matod ni Spoelstra, kinsa nagsugod pag-coach sa Heat niadtong 2009.
Ubos sa paggiya ni Spoelstra, ang Heat nakalangkat og back-to-back NBA titles.
Apan nagsugod ang kalbaryo sa Heat dihang mibalik si LeBron James sa Cleveland Cavaliers sa miaging season.
Nisamot kabug-at ang kalbaryo sa Heat dihang mibalhin sab si Dwyane Wade sa Chicago Bulls sa kasamtangang season unya nawala sab kanila si Chris Bosh gumikan sa injury. Hingpit nga nahanaw ang ilang Big Three.
Sa kasamtangang season, ang Heat nagkagidlay ug aduna kini 10-25 nga rekord.
Alang sa Heat, ang desisyon nga ipabilin si Spoelstra usa ka maayong lakang alang sa ilang tinguha nga magpalig-on og balik sa ilang puwersa.
“His philosophy as coach to me is, ‘Bring them to me and I’ll coach them.’ That’s it. That’s the way it has to be right now. He’s very involved in the process all the time,” matod ni team president Pat Riley.
“Every single player that we talk about or sign, he gives the nod because I don’t want to send him anybody that he doesn’t want.” AFP/ESL