SUGATON sa Cebu chess community ang bag-ong tuig pinaagi sa torneyo nga adunay talagsaong patakaran.

Gitumbok mao ang “Kita ang Katag” Open Chess Tournament nga sugdan karong adlawa sa Robinsons Galeria-Cebu.

Sa unang lantaw, daw usa lang kini sa naandang mga kompetisyon nga mosubay sa 7-Round Swiss System gamit unya human dayon.

Apan adunay gihimong mga kausaban si chess patron Dr. Darcy Tabo-Tabo ning maong torneyo nga gilaumang makadugang sa interes sa labing maayong chess players sa Sugbo.

Nagkanayon si fide arbiter Marvin Ruelan nga ang torneyo adunay tulo ka mga andana.

Ang premirong ang-ang mogamit sa naandang 7-Round Swiss System competition nga maoy modeterminar sa Top 14 players. Ning maong round, ang mopatigbabaw makadala na og P5,000 nga ganti.

Human niini, ang Top 14 apil ang duha ka wildcard winners bahinon sa ipat ka mga grupo diin magparang ang mga sakop sa matag grupo og simultaneous games batok sa usa’g usa. Ang maghari sa matag grupo makaabante sa final round.

Sa final round, ang mga magduduwa moagi na sab og simul games aron madeterminar ang grand champion.

Ang kampiyon sa ikaduhang ang-ang makakuha og P2,500.

Ang mokampiyon sa matag grupo mao ang magsangka alang sa ikatulo ug katapusang ang-ang sa kompetisyon.

Ang rehistrasyon nagbalor og P100 pesos. Alang sa dugang mga detalye, mahimong motawag kang Ruelan sa 0926-735-2951.