NAANGKON nila ni Cleveland Cavaliers superstars LeBron James ug Kyrie Irving ang top two spots sa Top 100 plays sa National Basketball Association (NBA) sa tuig 2016.

Kini gumikan sa ilang nahimo alang sa Cavaliers batok sa Golden State Warriors sa krusyal nga bahin sa kulbahinam ug makasaysayong deciding Game 7 sa 2015-16 finals series.

Ang makapaukyab nga palak ni James sa posible untang makapalabaw nga lay-up ni Warriors forward Andre Iguodala sa hinapos nga bahin maoy napiling No.1 sa listahan.

Naa sa ikaduhang luna ang nakapalabaw nga three-point shot ni Irving sa himatyong mga segundos.

Ang mabayanihong nahimo nila ni James ug Irving maoy nakahatag sa Cavaliers sa labing una niining titulo sa NBA ug labing unang mayorihiyang kampiyunato sa tanang klase sa paugnat sa kusog sa miaging 64 ka mga tuig. AFP/ESL