TINGUHA ni acting Governor Agnes Magpale nga masolusyonan sa Kapitolyo ang suliran sa traffic sa Metro Cebu karong tuiga.

Kini pinaagi sa pag-develop og mga laing mga agianan lakip na ang gitinguha nga transaxial highway.

Si Magpale nakadiskubre og dan gikan sa dakbayan sa Sugbo nga lahos na ngadto sa lungsod sa Compostela.

Gusto niya nga i-develop sa Kapitolyo ang dan nga magsubay gikan sa Barangay Talamban ngadto na sa Barangay Cambinucot sa dakbayan sa Sugbo kay giingong molahos na man kini sa Barangay Dapdap, lungsod sa Compostela.

Sigun sa opisyal nga kon mahatagan kinig katumanan, mapamubo ang tag-tulo ka oras nga biyahe paingon sa Compostela ug Danao City ilabi na kon traffic sa Mandaue hangtud na sa Liloan.

Inig balik ni Gob. Hilario Davide III gikan sa bakas­yon, suginlan siya ni Magpale sa mao niyang proposal.

Gawas sa dan paingon sa Compostela, giingong dunay laing agi-anan gikan sa dakbayan sa Sugbo nga molahos usab sa usa sa mga barangay sa siyudad sa Danao.

Gusto sab ni Magpale nga niining tuiga, masugdan na ang gitinguha nga transaxial highway aron dunay alternatibong agi-anan ilabi na sa mga bukirang bahin sa probinsiya ug alang usab sa mas paspas nga pagdala sa siyudad sa mga produkto ug abot sa kalungsuran.