MALINAWON ang tibuok Sugbo human sa Bag-ong Tuig.
Kini bisan kon dunay 63 ka mga tawo ang nangaangol sa mga pabuto sa tibuok rehiyon, samtang usa usab ka bata ang naigo sa saag nga bala nga natala sa Department of Health (DOH) 7 sukad niadtong ikaduhang semana sa Disyembre.
Sa dakbayan sa Sugbo, si Konsehal Dave Tumulak, deputy mayor for police matters ug chairman sa public order and safety sa konseho niingon nga way dagkong mga hitabo nga girespondehan sa kapulisan.
Matod ni Tumulak nga way nadakpan ang kapulisan nga nagdala og armas nga illegal ug wa say nadakpan nga nagbaligya og pabuto daplin sa kadalanan nga gidili sa Department of Interior and Local Government (DILG).
Samtang sa dakbayan sa Mandaue, si Mandaue City Police Director Robert Alanas niingon nga malinawon sa kinatibuk-an ang pagsaulog sa Bag-ong Tuig bisan sa pag-igo sa mga sunog sa tulo ka mga barangay sa siyudad.
Mao usab ang kini ang taho sa kapulisan sa lalawigan sa Sugbo.
Hinuon sa Consolacion, usa ka 13 anyos nga batang lalake naigo sa saag nga bala dihang mopadung sa pagpauli aron pagsugat sa Bag-ong Tuig.
Ang biktima giila nga si Junrey Ancero, nagpuyo sa Sitio Mangga, Baranggay Jugan, sa mao nga lungsod.
Segun sa pamahayag ni PO1 Jean Pierre Punay sa Consolacion Police Station nga si Ancero nagsakay sa iyang bisiklita kuyog sa iyang mga barkada padulong mouli.
Sa pag-abot ni Ancero sa ilang balay, nabantayan nga nagkadugo na ang tuo niya nga abaga ug nasuta nga naigo sa saag nga bala.
Wa dayon makadugo ang iyang samad ug wa dayon siya makabatyag og sakit.
Wa siya makabantay tungod sa kakalit sa hitabo ug daghan usab ang mga nagpabuto og firecrakers.
Dali nga gidala si Ancero sa iyang amahan sa Vicente Sotto Memorial Medical Center tungod kay nasuta nga nahabilin ang bala niini sa abaga ug gioperahan.
Miminos
Nikunhod og 14.86 porsiyento ang gidaghanon sa mga tawo nga nangaangol gumikan sa pabuto ug naigo sa saag nga bala sa Central Visayas gikan sa ikaduhang semana sa Disyembre 2016 hangtod sa pagsugat sa Bag-ong Tuig kon itandi sa samang panahon sa miaging tuig.
Sa data sa Regional Epidemiology and Surveillance Unit sa Department of Health 7 hangtod alas 11 sa buntag kagahapon, nasayran nga niusos sa 63 ang mga nabuthan sa pabuto apil ang duha ka tawo nga biktima sa saag nga bala sa pagsaulog sa Pasko ug pagsugat sa 2017.
Mas ubos kini kon itandi sa 74 nga nangaangol apil ang lima nga naigo sa saag nga bala sa 2016.
Ang dakbayan sa Sugbo maoy nakatala sa labing daghan nga mga nabuthan nga niabot og 16. Niño B. Baldevino USJ-R B.A. Communication Intern