GISALUBONG sa Atlanta Hawks ang San Antonio Spurs og pilde pagtabo sa unang adlaw sa bagong tuig.
Gipilde sa Hawks ang Spurs agi sa 114-112 kulbahinam nga kadaogan sa overtime atol sa 2016-17 NBA season sa Philipis Arena, home sa Hawks.
Nitala og double-double si Paul Millsap agi sa 32 puntos ug 13 ka rebounds, samtang nihatag si Tim Hardaway Jr. og 29 puntos ug lima ka rebounds.
Gikan sa 112-all sa overtime, ang tagsa nga freethrow nila Hardaway ug Dennis Schroder maoy nakapadaug sa Hawks sa himatyanon nga segundos nabilin sa dula.
Naay tsansa nga mapugos sa Spurs ngadto sa ika-duhang overtime apan nasimyat ni Kawhi Leonard ang iyang lay-up hinungdan naangkon sa Hawks ang kadaogan.
Sa ika-upat nga kwarter, gisalbar ni Hardaway ang Hawks human gipalumos niya ang iyang tres sa tres segundos nabilin aron matabla sa 100-tanan ug ngadto sa extension. (Source: NBA Stats)