UNOM ka mga batang Pinoy ang ipaubos sa eksklusibo nga training sa FC Barcelona didto sa Espanya pinaagi sa mga programa nga Astro Kem Bola ug TM Football Para sa Bayan.
Human sa 89 ka tuig sukad ang legendary football superstar Paulinho Alcantara niretiro sa FC Barcelona, ang mga Pinoy na usab nga maayo moduwa og football ang gihatagan og higayon nga maapil sa advanced training ug schooling sa pipila ka mga Spanish club sa football.
Ang unom mao sila si Lance Lawrence Locsin, Jared Alexander Peña, Ryan Philip Johansson, Astrid Heiress Ignacio, Mikaela Jacqueline Villacin ug Jasmine Cassandra Agustin.
Sila ang ipadala sa 12 ka adlaw nga Astro Kem Bola Overseas Training Programme sa Barcelona, Espanya karong buwana.
Sila nagpanuigon og 10 hangtod 12.
Ang team mao ang produkto sa duha ka buwan nga TM Football Para sa Bayan talent search nga gipasiugdahan sa Globe Telecom niadtong Hulyo ug Agusto.
Ang Globe maoy gipili sa Malaysian media ug entertainment powerhouse Astro nga partner niini sa pagkaplag og talented ug batan-ong mga athleta aron mabaid sa ilang abilidad sa football.
Si Globe Director for Citizenship Fernando Esguerra nipadayag og kalipay sa pagkapili sa unom ka mga magduduwa human sila nipailawom sa makuti nga kompetisyon sa ubang football players sa South East Asian region.
Ang unom kabahin sa 12 ka Filipino players nga ni-qualify alang sa Astro Kem Bola Advanced Training Programme nga gipahigayon sa Kuala Lumpur, Malaysia duha ka buwan na ang nakalabay nga gisalmotan sa 60 ka mga magduduwa gikan sa Malaysia ug Singapore.
“We are so happy with the turn-out, to think that this is the first time that Globe has partnered with Astro in this international activity,” matod ni Esguerra.
Siya nidugang ang TM Football Para sa Bayan nagsugod na sa paghimo og dekalidad nga mga magduduwa human sa upat ka tuig nga pagkahimugso.
Siya nanghinaot nga mahimo kini sinugdanan sa pagpalambo sa football dinhi sa nasod.
Ang mga player sa Pilipinas mokuyog sa 22 ka mga bata nga gikan sa Malaysia ug upat gikan sa Singapore nga bansaybansayon sa mga coach gikan sa FC Barcelona.
Si Datuk David Michael Yap, vice president of community affairs sa Astro, niingon nga nisaad ang Astro nga ipatigbabaw nila ang paugnat sa kusog ug sportsmanship alang sa mga atleta sa rehiyon pinaagi sa Astro Kem Bola.
Si TM Portfolio ug Brand Head Ray Guinoo, namulong ang kasinatian nga makat-onan sa mga bata maghatag og talagsaon nga kahigayonan nila kon hangtod asa maabot ang ilang mga talento bisan kon sila bata pa.
Si TM FPSB technical director ug Green Archers United coach Hans Peter Smit wala na masurprisa sa pagkahilakip sa pangan sa unom tungod siya mismo ang nangulo sa programa ug tryouts sa Iloilo, Bacolod, Davao ug Muntinlupa diin nisalmot ang mao nga mga bata sa nangaging buwan.
“This is a chance of a lifetime for these very young players. I wish that these kids will take it all in and savor the experience and use what they will learn to their advantage!” dugang niya.
Sila gipili dili lang sa ilang talento kondili apil usab sa ubang criteria sama sa team work, disiplina, batasan ug sportsmanship, communication on and off the pitch; positibo nga panglantaw sa mga teammate, volunteers, ug coaches; abilidad sa pagpaminaw og instructions; ug maayo nga personalidad. (PR)