HIMUONG mas community-based sa Provincial Tourism Office (PTO) ang ipahigayon nila nga Suroy-Suroy Sugbo karong tuiga.
Ang unang suroy karong tuiga, gitakda karong Enero 18 ngadto sa Enero 20.
Gitug-an ni Provincial Tourism officer Boboi Costas nga 10 ka mga dapit sa southern Cebu ang ilang pasuroyan sa mga mosalmot sa Suroy-suroy.
Kini naglakip sa Carcar, Argao, Boljoon, Santander, Samboan, Ginatilan, Alegria, Badian, Ronda ug Barili.
Sigun ni Costas, ilang ipasundayag ang nagkadaiyang colonial structures, public buildings ug mga heritage houses sa maong mga dapit.
Ang mga lumolupyo sa pipila ka mga lungsod maoy ilang gi-tap nga mogiya sa mga partisipante, mohimo sa giveaways ug modalit og mga pasundayag.
Nigahin og 100 slots ang PTO alang sa mga buot mosalmot sa Suroy-Suroy apan sa pagka-karon, 20 pa lang ang nagpa-reserve.
Gikan sa Enero 4 ngadto sa Enero 14, duna sila’y booth sa usa ka dakong mall alang sa walk-in reservation.
Sa mga interesadong moapil sa Suroy-suroy Southern Heritage tour, mag-range ang kantidad sa tour package gikan sa P7,650 ngadto sa P12,650, depende sa ilang accommodation.