KAPIN sa 400 ka mga bus ang nangabot sa Cebu South Bus Terminal (CSBT) gikan sa nagkadaiyang destinasyon sa habagatang Sugbo niadtong Lunes, uwahing adlaw sa nagkutay nga mga holiday.

Kini nunot usab sa pagpamalik na sa mga tawo sa siyudad gikan sa taas nga bakasyon.

Gihulagway sa operations manager sa CSBT, Joey Herrera, ang 436 ka mga bus nga nisulod tibuok adlaw niadtong Lunes puno kaayo sa mga pasahero, lakip na niadtong nagbarog lang sa biyahe.

Sa normal nga biyahe sa matag bus, magkarga ni og 45- 50 ka mga pasahero nga maglingkod.

Apan matod ni Herrera nga sama niadtong ting-uli alang sa Pasko ug Bag-ong Tuig, daghan ang ningsugal nga mobarog hinungdan nga puno ang mga sakyanan.

Nakadawat sab og taho si Herrera, nga daghan kaayo ang stranded passengers sa nagkadaiyang bus stop sa kalungsuran tungod sa kapuno na sa mga bus nga paingon sa dakbayan sa Sugbo.

Kagahapon, wa say pu-as ang pag-abot-abot sa mga pasahero nga gikan sa bakasyon sa habagatang Sugbo, ilabi na kay nibalik na ang regular nga trabaho ug klase sa mga tunghaan

Sa laing bahin, planong ipatawag sa kadagkuan sa CSBT ang mga bus operators aron tukion ang mga isyu nga naglambigit sa terminal, ilabi na ang kalabot sa schedule sa biyahe sa mga bus, isyu sa plitehan ug uban pa.

Gusto sa CSBT management nga mahan-ay kini alang sa mas hapsay nga pagpadagan sa terminal ka­rong tuiga.

Isugyot ni Herrera ngadto kang Gobernador Hila­rio Davide III ang pagpatawag sa tanang bus operators ug uban pang terminal stakeholders sa usa ka forum.

Nag-unang gustong matuki ni Herrera sa tigom ang schedule sa mga bus trip aron kalikayan usab nga maglibog ang mga pasahero.

Gawas niini, nagplano ang terminal pagbutang og P2 milyones nga kantidad sa Information Display System, diin makita ang lista sa mga bus nga mobiyahe matag oras.

Sa di pa ang Sinulog, tinguha ni Herrera nga matigayon na ang forum aron usab makuha na ang habig sa tanang stakeholders subay sa posibleng mga bag-ong polisiya nga ipatuman sa terminal karong tuiga.

Atol sa forum, lakip sa posibleng tukion ang kalabot sa plitehan ug dugang rota sa mga bus, nga magagikan sa CSBT.

Kon dunay concern ang mga bus operator, mahimo sab ni nilang ipaabot sa tagdumala sa terminal atol sa forum.